Müslüm Maqomayev doğum gününü qeyd etdi

Müslüm Maqomayev - 65

Dünən Azərbaycanın görkəmli musiqiçisi, SSRİ xaiq artisti, uzun illərdir Moskvada yaşayan həmyerlimiz Müslüm Maqomayevin 65 yaşı tamam oldu. Sovet estradasının ulduzu doğuın gününü Moskvada qeyd etdi.

M.Maqomayev 1942-ci il avqustun 17-də anadan olub. Ona Azərbaycan musiqisinin yaradıcılarından olan babası Müslüm MAqomayevin adı qoyulub. M.Maqomayevin atası, teatr rəssamı Məhəmməd Maqomayev II dünya müharibəsində qələbəyə iki gün qalmış həlak olub. Anası Ayşət Maqomayeva isə aktrisadır. M.Maqomayev əvvəlcə Bakı Konservatoriyasının nəzdindəki musiqi məktəbində təhsil alıb. Daha sonra Bakı Konservatoriyasının solo oxuma fakültəsinə daxil olub. O, 1962-ci ildə Kreml Sarayında verdiyi konsertdən sonra bütün Sovet ittifaqında tanınıb. M.Maqomayev ilk solo-konsertini 1963-cü ilin noyabrında Çaykovski adına Konsert Zalında verib. 1963-cü ildə Azərbaycan Dövlət Akademik Opera və Balet Teatrının solisti olan M.Maqomayev 1964-65-ci illərdə Milanın La Skala Teatrında təcrübə keçib. Təcrübəsini bitirdikdən sonra Moskvanın Böyük Teatrına dəvət olunan Maqomayev təklifdən imtina edib. 1966-69-cu illərdə Parisin tanınmış "Olimpiya" teatrında onun qastrolları keçirilib. Həmin teatrın direktoru Bruno Kokatris M.Maqomayevə onu beynəlxalq miqyasda tanıtmaq üçün müqavilə bağlamağı təklif edib. Ancaq SSRİ-nin mədəniyyət naziri bu müqaviləyə qadağa qoyub. M.Maqomayev 1969-cu ildə Sopotda keçirilən festivalda I yeri qazanıb və Kannda "Qızıl val" alıb. 1973-cü ildə SSRİ xalq artisti adına layiq görülən sənətkar həmin il Azərbaycan Dövlət Simfonik Orkestrinin bədii rəhbəri olub. M.Maqomayev "Nizami", "Oxuyur Müslüm Maqomayev", "Moskva notalarda" filmlərində çəkilib, 20-dən artıq filmə musiqi yazıb. 1997-ci ildə Günəş sisteminin balaca planetlərindən birinə onun adı verilib.

Ad gününü keçirmək istəmədiyini deyən yubilyar bildirib ki, insanların yaddaşında hər zaman xoş görkəm və yüksək sənəti ilə qalmaq istəyir.

Azərbaycanla əlaqələrinə gəlincə, müğənni keçmiş mədəniyyət naziri Polad Bülbüloğlu ilə münasibətlərinin pozulması səbəbindən son illər vətənə gəlməyib. 2005-ci ilin sonunda isə Azərbaycan vətəndaşlığından imtina etdiyini bildirib, qeyd edib ki, mədəniyyət naziri dəyişməyincə, Bakıya gəlməyəcək.

Bu arada İnquşetiya Respublikasının prezidenti Murad Zyazikovun fərmanı ilə Müslüm Maqomayev bu respublikanın xalq artisti adına layiq görülüb.

Ekspress.- 2007.- 18-20 avqust.- S. 20.