Nəsibə Abdullayeva yenidən Azərbaycan mahnısı oxuyub

Tacik, özbək, fars, türkmən və Azərbaycan mahnıları ilə özünə geniş repertuar quran Nəsibə Abdullayevanın ulduzu 80-ci illərdən parlamağa başlayıb. Həmin illərdə məşhur olan "Qaragöz" mahnısı böyükdən-kiçiyə hamının sümüyünü oynadırdı. Lakin əslən azərbaycanlı olan Nəsibə xanımın burada bəxti gətirmədi. O dövrün mətbuatı onun inciyərək əslən azərbaycanlı olan və müğənninin ansamblında çalışan həyat yoldaşı ilə ölkəni tərk edib Özbəkistana getdiyini yazıb. Onun kimlər tərəfindən incidildiyini deyə bilmirik. Amma həmin illərdə müğənninin plastinkaları "çörək kimi satılırdı" desək, yanılmarıq.
Çox keçməmiş Özbəkistanın Xalq artisti fəxri adını alan müğənninin yenidən Azərbaycan mahnıları ilə repertuarını zənginləşdirdiyi xəbərini aldıq. Əməkdar incəsənət xadimi, şair Baba Vəziroğlunun məlumatına görə, müğənni bəstəkar Kamalın məşhur olan "Səndən nigaranam" mahnısını lentə yazdırıb və ona klip çəkdirir. Xatırladaq ki, bəstəkarın müxtəlif illərdə Baba Vəziroğlu ilə birgə müəllifi olduğu "Xalq Heydər söyləyir", "Elegiya", "İnan mənə", "Ayrılığa dözərəm","Gecdi daha", "Gözlər yalan deməz" və "Səndən nigaranam" adında musiqi topluları işıq üzü görüb. Mahnıları ölkə hüdudlarından kənarda dinlənilən Kamal müəllimin sözügedən mahnısını Nəsibə xanım əldə edərək onu özünəməxsus və yeni aranjimanda lentə yazdırıb. Bundan öncə isə həmin mahnı Əməkdar artist Aygün Kazımovanın (aranjiman Vüqar Camalzadənindir) ifasında səsləndirilib.
   B.Vəziroğlunun əlavəsinə görə, Kamal müəllimə təqdim edilən lent yazısının tezliklə efir versiyası həllini tapacaq. "İkinci versiyada da mahnı ürəyəyatımlıdır və Şərq üslubunda səsləndirilib. Mahnı müəlliflərinin razılığından sonra hazırda Daşkəndin məşhur klipmeykerlərindən biri tərəfindən mahnı ekranlaşdırılır" - deyən Əməkdar incəsənət xadiminin sözlərinə görə, maraqlı ekran görüntüsünün sentyabr ayında təqdimatı nəzərdə tutulub. B.Vəziroğlu "Səndən nigaranam"ın yayımının Azərbaycan, Özbəkistan, Türkiyə və Orta Asiyanın teleməkanında nəzərdə tutulduğunu qeyd etdi. Qeyd edək ki, sözügedən müəlliflərlə Nəsibə Abdullayevanın əməkdaşlığı davam edəcək. Öyrəndik ki, tezliklə Kamal müəllimin musiqisi və Baba Vəziroğlunun sözlərinə Azərbaycan-Özbəkistan xalqlarının dostluğunu tərənnüm edən yeni bəstə ərsəyə gətiriləcək və Nəsibə xanımın ifasında səsləndiriləcək. Onu da qeyd edək ki, ilin sonunadək Bakının ən möhtəşəm konsert salonlarından birində N.Abdullayevanın konsert proqramının təşkili planlaşdırılıb.

Mövqe.-2007.- 9-10 avqust.-S.13.