Rusiyalı tarixci səhvini etiraf edib

Kiril Tomov: "Kitabın ikinci nəşrində həmin səhvi düzəltməyə cəhd edəcəyəm"

Qara Qarayevi erməni bəstəkarı kimi təqdim edən rusiyalı tarixçi Kiril Tomov səhvini etiraf edib.

APA-nın Şərqi Avropa bürosunun verdiyi məlumata görə, OXFAM təşkilatında çalışan həmyerlimiz Şəhla Əliquliyevanın Azərbaycan bəstəkarının milli mənsubiyyətinin düzgün göstərilməməsinə dair etiraz məktubuna cavab yazan Kaliforniya Universitetinin müəllimi, tarixçi K.Tomov səhvə yol verdiyini etiraf edib: "Mənim kitabım haqqında fikirlərinizə və aşkar etdiyiniz səhvi göstərdiyinizə görə sizə təşəkkür edirəm. Bəli, bu səhvdir. Qara Qarayev əlbəttə ki, erməni deyil, Azərbaycan bəstəkarıdır. Mən bu kitabın ikinci nəşrində həmin səhvi düzəltməyə cəhd edəcəyəm". Qeyd edək ki, K.Tomovun müəllifliyi ilə çap olunan Sovet İttifaqı dövrünün bəstəkarları haqqında elmi araşdırmada və məşhur Britanika Ensiklopediyasında Q. Qarayev erməni bəstəkarı kimi təqdim edilib.

Şərq.- 2007.- 28 avqust.- S. 14.