Qurbanlı D.

Aşıq İsfəndiyarın 70 illik yubileyi qeyd olunub

Azərbaycanımızın qədim mədəniyyətə, tarixə malik, saz-söz sənətinin, folklorumıızun qədim məskənlərindən olan, gözəl təbiətə malik, abad və yaraşıqlı, günü-gündən yeni-yeni uğurlar, nailiyyətlər əldə edən, qəhrəman, igid oğulları, alimləri, şairləri, yaradıcı el aşıqları ilə xalqımızın çoxəsrlik mədəniyyəti tarixində özünəməxsus yer tutan Gədəbəy rayonu ölkəmizdən kənarda da məşhurdur. Bu günlərdə mədəniyyət evində görkəmli el sənətkarı Azərbaycanın xalq aşığı, əməkdar mədəniyyət işçisi, prezident təqaüdçüsü, "Heydər baba" şerinin ilk müəllifi va ifaçısı aşıq İsfəndiyar Rüstəmovun 70 illiyi təntənəli surətdə qeyd edilib.

Yubilyarı təbrik etmək üçün ayrı-ayrı rayonlardan, şəhərlərdən - Bakıdan, Gəncədən, Şəmkirdən, Tovuzdan, Gürcüstandan və digər bölgələrdən şairlər, yazıçılar, el sənətkarları, alimlər, həkimlər, folklorşünaslar, idarə, müəssisə rəhbərləri və b. şəxslər mədəniyyət evinə, rayon mərkəzinə toplaşıblar.

Yubilyar və onu təbrikə gələnlər ümummilli liderimiz, dövlətimizin qurucusu və banisi, müdrik rəhbərimiz Heydər Əliyevin möhtəşəm abidəsini ziyarət ediblər, gül dəstələri qoyublar.

Sonra tədbir öz işini davam etdirib.

Aparıcı, görkəmli folklorşünas alim, aşıq sənətinin mahir bilicisi və təbliğatçısı Elxan Məmmədli çıxış edərək aşıq sənətinin tarixi və bu günü, aşıq İsfəndiyarın bu sənətin inkişafında, zənginləşdirilməsində rolu və xidmətlərindən, XX əsr aşıq məktəbinin daha da inkişaf etdirilməsində onun yaradıcı aşıq-şair kimi tarixi xidmətlərindən və onun şəxsi keyfiyyətlərindən, dünyada və türk dünyasında onun yaradıcılığına, səsinə yüksək qiymət verilməsindən geniş söhbət açıb və onu öz adından və iştirakçılar adından təbrik edib.

Yubiley tədbirində Gədəbəy Rayon İcra Hakimiyyətinin başçısı Kamran Rzazadə çıxış edərək dövlətimizin, ulu öndərimizin layiqli davamçısı prezident İlham Əliyevin bütün sahələrə göstərdiyi diqqət və qayğıdan, dövlət başçımızın uğurlu daxili və xarici siyasətindən və eyni zamanda ölkənin birinci xanımı Mehriban Əliyevanın təhsilimizə, mədəniyyətimizə, mədəniyyət işçilərinə göstərdikləri qayğını yüksək qiymətləndirib. Və yubilyarın yaradıcılığına, ictimai fəaliyyətinə yüksək qiymət verərək onu təbrik edib.

Yubilyara Mədəniyyət Nazirliyinin təbrik teleqramı oxunub. Bundan başqa İrandan, Türkiyədən və digər MDB dövlətlərindən təbrik teleqramları göndərilib.

Tədbirdə şairlər, yazıçılar, elm və mədəniyyət, səhiyyə işçiləri, respublika Aşıqlar Birliyinin rəhbərliyi, el sənətkarları, aşıqlar çıxış ediblər. Aşığın yaradıcılığına yüksək qiymət verilib və həqiqətən də aşığın XX əsrin ikinci yarısından bu günədək olan əlli ildən artıq bir dövrü əhatə edən yaradıcılığı aşıq sənətimizin zənginləşməsində rolu xüsusi qeyd edilib.

Aşığın 1990-cı illərdə yazdığı "Heydər baba, dərdimizə şərik ol" şeiri, 1998-ci ildə Gəncə şəhərində Heydər Əliyevin qarşısında yeni bir "Heydər baba" şerilə mahnı ifa etməsi, Heydər Əliyevin isə aşığın baba deyə müraciət etməsinə aşıq İsfəndiyara gülə-gülə "mən babayam daha?!" deməsi və aşığın isə Heydər Əliyevə - "Atatürk türklərin atasıdır, ona ata adı veriblər, sizə də öz şeirimlə milyonların fikrini ifadə edərək baba adı verirəm" deməsi və s. söhbətləri və xatirələri barədə geniş söhbət açılıb.

Yubiley mərasimində çıxış edən Aşıq İsfəndiyar yubiley iştirakçılarını salamladıqdan sonra yubileyin təşkilatçılarına, rayon icra hakimiyyətinin başçısı Kamran Rzazadəyə minnatdarlığını bildirib. Əməyinı verilən yüksək qiymətə görə prezident İlham Əliyevə dərin təşəkkürünü və minnətdarlığını bildirib. Ulu öndərimiz Heydər Əliyevin tarixi xidmətlərindən, onunla görüşüb söhbət etməsindən ürək dolusu danışıb və Allahdan ona rəhmət diləyib. Aşıq öz sazı, sözü ilə yubiley mərasimində gözəl mahnılar ifa edib.

Biz də təbrikə qoşuluruq və aşıq İsfəndiyarı əlamətdar yubileyi anadan olmasının 70 illik yubileyi münasibəti ilə təbrik edir, ona uzun ömür, can sağlığı, yeni-yeni yaradıcılıq uğurları arzu edirik. Gün o gün olsun ki, 100 illik yubileyinizi qeyd edək! 70 yaşınız mübarək, aşıq İsfəndiyar!

Azad Azərbaycan.- 2007.- 1 avqust.- S. 6.