Teatr heç nədən asılı olmamalıdır

Afaq Bəşirqızı: İncəsənətin vəziyyətini qənaətbəxş hesab etmirəm

"Bu gün Azərbaycan incəsənətinin vəziyyətini o qədər də qənaətbəxş hesab etmirəm. İncəsənətimizin inkişaf etməsi üçün mütləq konsepsiya olmalıdır. Bu, heç bir qərar və qanunla həyata keçən bir şey deyil. Ümumiyyətlə, incəsənətin vəziyyətini yaxşılaşdırmaq üçün dünən hər bir sahənin rəhbəri onun konsepsiyasını fikirləşməlidir. Bunun təkcə təşkilat və idarələrin üstünə qoymaq olmaz". Bu sözləri APA-ya açıqlamasında bu gün 52 yaşını tamamlayan xalq artisti Afaq Bəşirqızı deyib. Azərbaycan kinosu və teatrının durumuna toxunan aktrisa bildirib ki, vəziyyətdən çıxmaq üçün hamının əl-ələ verməsi vacibdir. O, Azərbaycanda teatrlara sərbəstlik verilməsini vacib hesab edir: Teatrlara mütləq sərbəstlik verilməli, onlar heç nədən asılı olmamalıdır. Bu sərbəstlik repertuar seçimindən tutmuş aktyor seçiminə qədər olmalıdır. Yalnız bundan sonra teatrın inkişafından danışmaq olar. Hər halda, Azərbaycan teatrı püxtələşməlidir. Bunun nə zaman reallaşacağını demək isə çətindir".

Azərbaycan kino və teatr sənətinin inkişafı üçün bu günə kimi əlindən gələni əsirgəmədiyini deyən aktrisa bundan sonra da bacardığını edəcəyini söyləyib: "Mənə verilən qiymətdən belə nəticəyə gəlirəm ki, fəaliyyətim heç də pis deyil. Sənətimi sevənləri çox şeylər gözləyir və mən də bunun üçün bacardığımı edəcəyəm". Doğum günündə özünə cansağlığı və ailə xoşbəxtliyi arzuladığını deyən A.Bəşirqızı daima səhnədə olmaq, sevib-sevilmək istəyir: "Bu gün 52 yaşım tamam olur. Bu illər ərzində sevib sevilmişəm. Çox şükür ki, yetərincə sevilirəm və bununla fəxr edirəm. Məni sevənlərin gözünü heç zaman yolda qoymayacağam. inşallah, sentyabrda bir sıra layihələr həyata keçirəcəyəm". A.Bəşirqızı onu da deyib ki, sentyabrda Azərbaycan Dövlət Musiqili Komediya Teatrında hazırlanacaq Tamara Vəliyevanın və Faiq Sücəddinovun "Dəyərəm min cavana" tamaşasında oynayacaq.

Yeni Azərbaycan.- 2007.- 16 avqust.- S. 8.