Məmmədov M.

Böyük bağ Naxçıvanda yenidən gözəl ünvanlardan birinə çevrilib

İndi Naxçıvanda gözəl və yaraşıqlı bağlardan, parklardan söhbət düşəndə "Böyük bağ" adlanan mədəniyyət və istirahət parkının da adı birincilər sırasında çəkilir. Son vaxtlar burada aparılan abadlıq və quruculuq işləri parka yeni görkəm gətirib. Şəhərin gözəl ünvanlarından biri də artıb.
Bir vaxtlar "Böyük bağ" Naxçıvan şəhərinin gözəl və rahat istirahət guşələrindən biri olub. Amma ötən əsrin doxsanıncı illərinin əvvəllərində ölkəmizdə başlanılan dağıdıcılıq psixologiyası bu ünvandan da yan ötməyib.Ondan beş-altı il sonra isə burada bir qədər abadlıq və təmir işləri görülsə də, sonralar bunlarla kifayətlənilməyib. Bu səbəbdən bu ilin əvvəllərindən həmin ünvan yenidən inşaatçıların ixtiyarına verilib. Naxçıvan şəhərindəki abadlıq və təmir-tikinti idarəsinin kollektivi burada geniş həcmdə quruculuq işləri aparıb. Aparilan işlər indi zövq oxşayır.
Parkda ilk növbədə adamların rahatlığı üçün piyada keçid yolları və su arxları qaydaya salınıb. Böyük həcmdə əraziyə bəzək daşları döşənib. Yerli istehsalın digər məhsulu olan travertin daşlarla bardurlar çəkilib. Sakinlərin rahatlığı üçün ayrı-ayrı yerlərə skamyalar qoyulub.
Muxtar respublikanın bir neçə mədəniyyət müəssisəsi də bu ərazidə yerləşir. Onlardan biri də böyük yazıçı və jurnalist Cəlil Məmmədquluzadənin adını daşıyan Ədəbiyyat muzeyidir. Aparılan quruculuq işləri sayəsində bu muzeyin ətrafında da bir çox işlər görülüb. Bu qayğıdan Naxçıvan MR Dövlət Filormoniyasının yerləşdiyi ünvana da pay düşüb. Üstəlik də ötən əsrin iyirminci illərində Naxçıvanda yeni həyat quruculuğu uğrunda mübarizədə canlarını gurban verən sərhədçilərin şərəfinə ucaldılan "On yeddilər" abidəsi də yenidən qurularaq ziyarətgaha çevrilib.
Mədəniyyət və istirahət parkında görülən işlər bunlarla bitməyib. Burada müasir üslubda "Çay evi" də inşa olunub. Elə bir obyekt ki, onun Naxçıvan şəhərində tayı-bərabəri yoxdur. Ən mühüm yeniliklərdən biri də stolüstü idman oyunları ilə məşğul olmaq istəyənlərə yaradılan şəraitdir. Dairəvi və böyük çardaq şəklində yaradılan bu pavilyonda eyni vaxtda onlarla adam asudə və istirahət vaxtlarını mənalı keçirə bilir.
Bu ərazidə inşa olunan ikimərtəbəli müasir tipli "Əyləncə mərkəzi" istifadəyə veriləndən sonra parkın gözəlliyi daha da artacaq. Burada ayrı-ayrı idman salonları ilə yanaşı, kompüter mərkəzi, həmçinin kafe də fəaliyyət göstərəcək. Hazırda isə inşaatçılar obyektdə beton dayaqların quraşdırılması ilə məşğuldurlar.

Azərbaycan.-2007.-1 avqust.-S.6.