Bülbülün həyat yoldaşının 85 illik yubileyi qeyd edilmişdir

Avqustun 22-də görkəmli vokalçı, unudulmaz müğənni Bülbülün xatirə muzeyində qurumun direktoru, sənətkarın ömür-gün yoldaşı Adelaida Məmmədovanın 85 illik yubileyi qeyd edilmişdir.
Mədəniyyət və turizm naziri Əbülfəs Qarayev yubilyarı təbrik etmişdir. Nazir demişdir ki, avqustun 21-də Prezident İlham Əliyevin sərəncamı ilə Azərbaycanda muzey işinin inkişafındakı xidmətlərinə görə Adelaida Məmmədova "Şöhrət" ordeni ilə təltif edilmişdir. Yüksək mükafat təkcə yubilyarın deyil, bütövlükdə muzey işçilərinin əməyinə verilən qiymətdir.
Nazir Azərbaycanda vokal məktəbinin əsasını qoyan, musiqi sənətimizin inkişafında əvəzsiz xidmətləri olan dahi Bülbülün muzeyini sonsuz məhəbbətlə qoruyub saxlayan A.Məmmədovanın zəhmətini yüksək qiymətləndirmişdir.
Əbülfəs Qarayev yubilyara ad günü münasibətilə nazirliyin mükafatını təqdim etmişdir.
Tədbirdə çıxış edən Adelaida Məmmədova fəaliyyətinə verilən yüksək qiymətə, ona göstərilən böyük diqqət və qayğıya görə ölkəmizin başçısı İlham Əliyevə minnətdarlığını bildirmişdir.
A.Məmmədova demişdir ki, ulu öndər Heydər Əliyevin Azərbaycana birinci dəfə rəhbərlik etdiyi dövrdə Bülbülün xatirə muzeyinin təntənəli açılışı olmuşdur. Ümummilli liderin ikinci dəfə hakimiyyətə qaydışından sonra Bülbülün 100 illik, Prezident İlham Əliyevin sərəncamı ilə isə 110 illik yubileylərinin keçirilməsini xatırladan A.Məmmədova bütün bunları sənətə və sənətkara verilən qiymətin bariz nümunəsi olduğunu söyləmişdir.
Muzeyə rəhbərliyinin otuz illik bir dövrü əhatə etdiyini bildirən yubilyar demişdir ki, böyük sənətkarımız Bülbül 1937-ci ildən ömrünün sonunadək bu mənzildə yaşayıb yaratmışdır.

Azərbaycan.-2007.-23 avqust.-S.3.