İbrahimova S.

Əcnəbilərin abidələrimizə marağı artıb

Qız qalası, Atəşgah və Şirvanşahlar Saray Kompleksinin

direktoru bunu təbliğat işləri ilə əlaqələndirir

"Qız qalasında aparılan bərpa işləri cari xarakter daşıyır və binanın ağardılması planlaşdırılmayıb". Bunu şəhərdəki bir sıra qədim binaların təmiri zamanı əvvəlki görkəmini itirməsi ilə bağlı narahatlıqlara münasibət bildirən Qız qalası, Atəşgah və Şirvanşahlar Saray Kompleksinin direktoru Rəna Rzayeva deyib. Onun sözlərinə görə, abidədə bərpa ancaq binanın üst tərəfində bəzi yerlərdə düşmüş daşların yerinə qoyulması məqsədi daşıyır. Eyni zamanda, daşların arasında bitmiş bitkilərin təmizlənməsi nəzərdə tutulub. Qız qalasının əvvəlki görkəminin dəyişdirilməsi isə müzakirə mövzusu deyil.

Rəna Rzayeva ilə söhbət əsnasında onu da öyrəndik ki, son zamanlar ölkədə turizmin inkişafı ilə əlaqədar tarixi abidələrə əcnəbilərin marağı artıb. Xüsusilə yay aylarında ölkəyə turist axını Qız qalası, Atəşgah və Şirvanşahlar Sarayında bir illik biletlərin yarım ildə satılıb qurtarmasına səbəb olub. Direktorun dediyinə görə, hazırda kompleks biletlərin yenidən çapı ilə bağlı sifariş verib. Əcnəbi turistlərin bu abidələrə marağının böyük olduğunu deyən R.Rzayeva bunu son zamanlar aparılan təbliğat və məlumatlandırma işlərinin yüksək səviyyədə təşkili ilə əlaqələndirib.

Müsahibim onu da bildirdi ki, Şirvanşahlar sarayında hər həftə yerli və əcnəbi musiqisevərlər üçün təşkil edilən muğam gecələrinə fasiləveriləcək. Xatırladaq ki, bu il martın 14-dən başlayaraq hər həftə keçirilən muğam gecələrindən sonuncusu avqustun ortalarında baş tutacaq. Həmin gün keçiriləcək XX muğam gecəsindən sonra sentyabraqədər muğam gecələrinə fasilə veriləcək. Saray layihəni sentyabrın 5-dən davam etdirəcək. Məlumat üçün bildirək ki, muğam gecələrinin biletləri yerli əhali üçün 2 manat, əcnəbi vətəndaşlar üçün isə 10 manatdır.

Kaspi.-2007.-11-13 avqust.-S.20.