Oaracəmillidə Əhəmənilərin iqamətgahı tapılıb

"Şəmkirin Qaracəmilli kəndi yaxınlığında apardığımız arxeoloji qazıntılar zamanı gözlədiyimizdən də qiymətli tapıntılar aşkarlamışıq", -bu açıqlamanı APA-ya Azərbaycan Milli Elmlər Akademiyasının arxeologiya və etnoqrafiya şöbəsinin müdiri, AMEA-nın müxbir üzvü, professor İlyas Babayev verib.

Onun sözlərinə görə, sözügedən ərazidə aparılan arxeoloji qazıntılar nəticəsində yaşı 2500 ilə yaxın olan inzibati binanın bünövrəsi və orta sütun altlıqları aşkarlanıb. Qaracəmilli kəndi yaxınlığında arxeoloji qazıntı işlərini Almaniya-Azərbaycan-Gürcüstan birgə arxeoloji ekspedisiyası aparır. Qazıntı işlərində alman arxeoloq Florian Klaus, gürcü arxeoloq Yulon Qaqaşidze və professor (İlyas Babayev iştirak edir.

İlyas Babayev ekspedisiyanın keçən ildən fəaliyyət göstərdiyini və bütün maliyyə xərclərinin Almaniya hökuməti tərəfindən ödənildiyini deyib: "Bu ərazidə bizim öyrəndiyimiz abidə Əhəmənilər dövründə inşa edilib və eramızdan əvvəl birinci minilliyin ortalarına aid bir abidədir. Burada tapılan inzibati bina, çox güman ki, Əhəmənilər dövlətinin Cənubi Qafqazda yerləşən böyük iqamətgahıdır. Bu cür abidələr Azərbaycanda ilk dəfə Qazax rayonunda 1958-1959-cu illərdə tapılıb. Balaca binanın bir hissəsi və onun içərisində iki sütun altlığı olan bu tapıntı isə hal-hazırda Bakıda tarix muzeyində nümayiş etdirilir. Əhəmənilər imperiyası süqut etdikdən sonra bu inzibati bina istifadəsiz qalıb. Bu gün biz bu ərazidə eramızdan əvvəl IV əsrə aid tapıntılar əldə etmişik".

İ.Babayevin sözlərinə görə, Əhəmənilər dövləti süquta uğradıqdan sonra bu binada yaşayış olmayıb: "Lakin tapıntılar göstərir ki, burada müxtəlif dövrlərdə işləyiblər. İstərdik ki, bu cür tədqiqatları davam etdirək. Şəmkir ərazisində böyük təpələr çoxdur. Almaniyadan xüsusi aparatlar gətirmək və təpələrin altında nələr olduğunu yoxlamaq fikrimiz var. Bu ərazilər geniş bölgəni əhatə edir və görünür ki, bura Əhəmənilər dövründə böyük inzibati mərkəz olub. Yeni tapılan inzibati binanın sütun altlıqları olan otağının sahəsi 101 kvadratmetrdir. Bu otağın ətrafında isə kiçik otaqlar var. Bu binanın bünövrəsi çınqıl daşdan, divarları isə o dövr üçün səciyyəvi olan çiy kərpicdən tikilib".

Qeyd edək ki, hazırda Şəmkirin Qaracəmilli kəndi yaxınlığında aparılan arxeoloji qazıntılar davam edir. Almaniya hökumətinin ayırdığı vəsait hesabına aparılan qazıntılarda təqribən 20-yə yaxın şəxs iştirak edir. Qazıntı işlərinə Qaracəmilli kəndinin sakinləri də işçi qüvvəsi kimi cəlb olunub.

Ekspress.- 2007.- 24 avqust.- S. 12.