Mehdixanlı T.

Abidələr qorunur, bərpa olunur

Xalqımız zaman-zaman müxtəlif quruluşlarda yaşamağa məcbur olmuş, istədiyi kimi qurub-yarada bilməmiş, tarixi memarlıq nümunələrinə, abidələrə lazımi qədər qayğı göstərmək imkanında olmamışdı. Çox şükürlər ki, indi vəziyyət dəyişib, azadlıq, sərbəstlik dövrünü yaşayırıq.
"Hökumət evi"nin önündə Qərib adlı ağsaqqalla tanış olduq. Söhbətimiz zamanı ondan eşitdik: "Yetmiş il ərzində Bakıda tikilməyən yaşayış, inzibati binalardan yüz dəfə artığı son on ildə inşa edilib. Paytaxtımızın hüsnü-camalı gündən-günə dəyişir, gözəlləşir. Çünki daha müstəqil ömür sürürük, yaşayırıq. Görürsünüz bu binanı necə gözəl, bərpa-təmir ediblər? Bunun üçün dövlətimizin başçısına minnətdar olmalıyıq".
Son vaxtlar yeni binalar tikib ucaltmaqla yanaşı, tarixi abidələrin, yadigarların qorunmasına da diqqət artıb, onların təmiri-bərpası qayğısına qalınır. Möhtərəm Prezident İlham Əliyevin 18 avqust 2006-cı tarixdə "Azərbaycan Respublikasının paytaxtı Bakı şəhərində tarixi-memarlıq abidələrinin bərpası və qorunması haqqında" verdiyi sərəncam işlərin daha da sürətləndirilməsinə şərait yaratmışdı. Ətrafında, xarici görünüşündə və daxilində əsaslı abadlıq, təmir-bərpa işləri aparılan obyektlərdən biri də möhtəşəm, orijinal görünüşü ilə seçilən "Hökumət evi"dir. AMEA-nın müxbir üzvü, görkəmli memar Cəfər Qiyaslı deyir:
- Bu binanın bəxti əvvəldən gətirməmişdi. Zamanın tələbi ilə əcnəbi L.Rudnevin də iştirak etdiyi, amma əsas xidmətləri olan Sadıq Dadaşovun, Mikayıl Hüseynovun verdikləri layihənin müzakirəsi qanlı repressiya dövrünə düşmüşdür. İnsanlar günahsız əzablara, işgəncələrə düçar olmuşdular. Bütün bunlara baxmayaraq sənət yaşamışdır. Tanınmış memar, akademik Mikayıl Hüseynovun təklifi birinci yerə layiq görülmüş, binanın tikintisinə başlanmışdı. Ancaq bünövrədə ilk işlər gedərkən proses dayandırılmışdı. İkinci Dünya müharibəsi çox arzular kimi tikintini də yarımçıq qoymuşdu. Yalnız müharibədən sonra inşaat davam etdirilmişdi. Altmış ildən artıq yaşı olan, şəhər sakinlərinin, qonaqların diqqətini çəkən bina son vaxtlar əzəmətini, memarlıq şöhrətini az qala itirmiş, görünüşü eybəcər hala düşmüşdü. Prezident İlham Əliyevin sərəncamından sonra onun təmir-bərpa işlərinə başlandı. Ətrafında zövq oxşayan səliqə-sahman yaradıldı. Binanın daxilində bərpa işləri davam etdirilir. Bir sözlə, "Hökumət evi" ikinci ömrünə qədəm qoyub. Daim qonaqlı-qaralı paytaxtımızın memarlıq nümunəsinin rəmzi kimi baxılır, yaddaşlarda qalır. Bu qayğıya, diqqətə görə sənətkarlar, sakinlər adından cənab Prezident İlham Əliyevə dərin minnətdarlığımı bildirirəm.
Binanın daxilində işlər sürətlə, yüksək keyfiyyətlə aparılır. Rastlaşdığımız, əməyindən fərəh duyduğunu gördüyümüz gənc bərpaçı Etibar qürur hissi ilə dedi: "Tarixi abidələri qorumaq, yaşatmaq borcumuzdur, onlar bizlərə yadigar, əmanətdir. Müdriklər demiş, əmanətə xəyanət olmaz".


Dövlət başçısı cənab İlham Əliyevin gündəlik qayğısı, diqqəti sayəsində bütün regionlarımızda da tikinti-quruculuq, tarixi abidələrin bərpası və qorunması işləri uğurla davam etdirilir. Rayonların mərkəzi, kənd və qəsəbələrin görünüşü könül açır, göz oxşayır. İqtisadi inkişafımız yüksəldikcə həyat tərzimiz, güzəranımız firavanlığa doğru dəyişir. Xalqımız xoşbəxt gələcəyə, işıqlı sabahlara doğru inamla, ümidlə baxır.

Azərbaycan.-2007.-21 avqust.-S.6.