Tarixi abidələrin ərazilərində abadlıq isləri aparılır

Qax rayonunun İlisu Dövlət Tarix-Mədəniyyət Qoruğu ərazisində yerləşən XVII-XVIII əsrlərə aid Sumuq qala-memarlıq abidəsinin və Qum kəndində erkən orta əsrlər dövründə inşa edilmiş alban məbədinin ətrafında geniş abadlıq işləri aparılır. Hər iki abidə rayonun turizm marşrutuna daxil edilmişdir.

Rayon icra hakimiyyətindən AzərTAc-a bildirmişlər ki, Sumuq qala-memarlıq abidəsinin bərpasına 2003-cü ildə başlanılmışdır. Mədəniyyət və Turizm Nazirliyinin vəsaiti hesabına həyata keçirilən bərpa işlərinin ilkin mərhələsində qalanın torpaq altında qalan hissəsi və ətrafı qazılaraq üzə çıxarılmış, abidə tam bərpa olunaraq öz əvvəlki görkəmini almışdır. Hazırda qalanın ətraf ərazisində geniş abadlıq işləri aparılır: Abidəyə gediş-gəlişi asanlaşdırmaq məqsədilə Qax-İlisu yolundan qalaya giriş yolu da çəkilmişdir. Abidəni sel sularından etibarlı mühafizə etmək üçün isə ərazidə sahilbərkitmə işləri aparılır, kanallar çəkilir. Tikinti-abadlıq işlərini Mədəniyyət və Turizm Nazirliyinin Şəkidəki 4 nömrəli Elmi Bərpa İstehsalat İdarəsinin kollektivi həyata keçirir.

Bundan əlavə, hazırda konservasiyası ötən ilin noyabrında başa çatmış Qum kəndindəki erkən orta əsrlərə aid alban məbədinin ətrafında da rayonun daxili imkanları hesabına xüsusi layihə əsasında geniş abadlıq işləri aparılır. Mədəniyyət və Turizm Nazirliyinin vəsaiti ilə tezliklə Qax baş kəndinin ərazisində yerləşən Həsənxan qalasında da bərpa işlərinə başlanılması nəzərdə tutulur.

Azərbaycan.- 2007.- 10 avqust.- S. 5.