2008-2017-ci illərdə Turizmin inkişafı Proqramı Nazirlər Kabinetinə təqdim edilmişdir

Mədəniyyət və Turizm naziri Əbülfəs Qarayev dekabrın 10-da keçirdiyi geniş mətbuat konfransında İslam Konfransı Təşkilatı ölkələrinin Mədəniyyət və Turizm nazirlərinin Liviyada keçirilən qurultayında və Dünya Turizm Təşkilatının Kartaxenada (Kolumbiya) təşkil olunmuş konfransında iştirakından söhbət açmışdır.

Nazir demişdir ki, Azərbaycanın bu sahədə rolu qurultayın beş sənədində xüsusi vurğulanmışdır. Sənəddə Azərbaycanın birinci xanımı Mehriban Əliyevanın geniş fəaliyyəti də əksini tapmışdır ki, bu da ölkəmizin həmin sahədə əhəmiyyətli irəliləyişindən danışmağa əsas verir. Qurultayda kifayət qədər ciddi məsələ olan turizm etikası məsələsi də qaldırılmışdır. Həmin məsələ təkcə daxili və xarici turizm sahəsində etikanın inkişafını deyil, həm də çox vaxt turizmin girovuna çevrilən təbiətin, tarix və mədəniyyət abidələrinin qorunması məsələlərini əhatə edir. Ə.Qarayevin fikrincə, ən böyük nailiyyət Azərbaycanın işğal olunmuş ərazilərində, eləcə də Ermənistanın özündəki tarix və mədəniyyət abidələrimizin "erməniləşdirilməsi" haqqında bəyanatın konfransda ilk dəfə səsləndirilməsi olmuşdur. Bu isə o deməkdir ki, bütün İslam dünyasında hiddət doğuran həmin problem artıq bir dövlətin hüdudlarından kənara çıxmışdır.

Mədəniyyətin 2008-ci ildə prioritet sahə olacağını vurğulayan Ə.Qarayev demişdir: "Biz bu il kitabxanalara və muzeylərə böyük diqqət yetirmişik. 2008-ci ilin planlarına bölgələrdə klub sisteminin, mədəniyyət evlərinin yenidən qurulması daxildir. Artıq 5 klub üçün pilot layihələr hazırlanmışdır. Mədəniyyətin qalan sahələrinə gəldikdə isə, biz onların heç birini "axsamağa" qoymayacağıq".

Nazir jurnalistlərin suallarına cavab verərkən bildirmişdir ki, 2008-2017-ci illərdə turizmin inkişafına dair proqram hazırlanmış və baxılmaq üçün Nazirlər Kabinetinə təqdim edilmişdir.

Respublika.- 2007.- 11 dekabr.- S. 6.