Arifə

Tələbə uğuruna ustad sevinci

Bu günlərdə Akademik Milli Dram Teatrı özünün 135-ci mövsümündə maraqlı tamaşalarından birini sənətsevərlərə təqdim edib. Görkəmli türk dramaturqu Tuncer Cücenoğlunun "Çığ" pyesi əsasında Bəhram Osmanovun hazırladığı "Uçqun" tamaşası teatrın həyatında əsl hadisəyə çevrildi. Səhnəyə dəvət olunub tamaşaçılar tərəfindən dönə-dönə alqışlanan sənətçilər sırasında, əlbəttə ki, baş rolların ifaçıları Səidə Quliyeva, Telman Əliyev, Kazım Abdullayev, Mətanət Atakişiyeva, İlyas Əhmədov, Vəfa Rzayeva ilə yanaşı həm də pyesin tərcüməçisi, şair Dilsuz, bəstəkar Səyavuş Kərimi, quruluşçu rəssam, əməkdar incəsənət xadimi Ağarəhim Əliyev də vardı. Ən maraqlısı da o idi ki, onların arasında daha iki gənci xüsusi olaraq təqdim etdilər. Bunlar Azərbaycan Dövlət Mədəniyyət və İncəsənət Universitetinin Rəssamlıq fakültəsinin buraxılış kurs tələbələri Sevinc Həsənova ilə Ayan Əzizova idi. Bunu istər Akademik Milli Dram Teatrının, eləcə də Mədəniyyət və İncəsənət Universitetinin tarixində ürəkaçan hadisə adlandırmaq olar. Ona görə ki, Azərbaycan teatr sənətinin baş məbədi sayılan bu teatrda həmin tələbələrin "Uçqun" tamaşasına verdikləri tərtibat, yaratdıqları dekorlar, kostyum və əlbisələr həm də onların diplom işləriydi və əlbəttə ki, gənc rəssamları bu böyük imtahana hazırlayan quruluşçu rəssam Ağarəhim Əliyevin sevinci yerə-göyə sığmırdı. Təcrübəli rəssam onu da bildirdi ki, bu iki gəncin Akademik Teatra gəlişi təsadüfi olmayıb. Onlar hələ tələbəlik illərində özlərini göstərib, təsviri sənətin ən çətin janrlarından sayılan teatr rəssamlığını seçiblər. Maraqlıdır ki, Azərbaycan Dövlət Mədəniyyət və İncəsənət Universitetinin rektoru Timuçin Əfəndiyevlə Ağarəhim Əliyev bir görüş münasibətilə İtaliyada səfərdə olarkən özləri ilə məhz Sevinclə Ayanın orijinal işlərini aparıblar və orda İtaliya Rəssamlıq Akademiyasının rektorunun həmin əsərlərə marağını görüb onları rektora hədiyyə ediblər. İnanırıq ki, bu gənc istedadların sənət uğurları davamlı olacaq.

525-ci qəzet.- 2007.- 14 dekabr.- S. 7.