Festival çərçivəsində növbəti sərgi keçirilmişdir

 

Mədəniyyət və Turizm Nazirliyinin təşkilatçılığı ilə keçirilən "Alüminium" III Beynəlxalq müasir incəsənət biennalisi-festivalı çərçivəsində 19 ölkədən gəlmiş rəssamların növbəti sərgisi Muzey Mərkəzində açılmışdır.
Rəssamlar İttifaqının sədri, xalq rəssamı Fərhad Xəlilov bildirmişdir ki, sərgidə təsviri incəsənətin müasir perfomans, videoart, fotoqrafiya, instalyasiya və eləcə də, ənənəvi heykəltəraşlıq və boyakarlıq janrlarında əsərlər nümayiş olunur. F.Xəlilov qeyd etmişdir ki, xarici ölkələrdən gəlmiş rəssamlarla yanaşı, 35 azərbaycanlı rəssamın əsərlərinin də nümayiş olunduğu bu sərginin əsas mahiyyəti müasir dünyada yuxu ilə gerçəklik arasında prinsipial fərqin, sərhədin varlığını dərk etməkdən ibarətdir.
Sonra tədbir iştirakçıları 5 böyük salondan ibarət sərgidə təqdim olunan videoart, fotoqrafiya, heykəltəraşlıq və boyakarlıq əsərləri ilə tanış olmuşlar. Bədii zövq, insanın daxili azadlığı, inanılmaz yuxu və acı həyat gerçəklərinin tərənnüm olunduğu bu əsərlər tamaşaçılar tərəfindən rəğbətlə qarşılanmışdır.
Sərgidə sloveniyalı fotoqraf Vesna Çervineçin üç fototablosu xüsusilə diqqəti cəlb etmişdir. Fotolardakı səmimilik, həyatilik və hay-küydən uzaq, sakit bir dünyanı qurmağa çağırış motivi daha xarakterikdir.

 

Azərbaycan.- 2007.- 6 dekabr .- S. 5.