Əyyuboğlu İ.

2008-ci il Avropada "Mədəniyyətlərarası dialoq ili" elan edildi

Avropa İttifaqı 2008-ci ili Mədəniyyətlərarası dialoq ili elan etdi. Dialoq ili çərçivəsində keçiriləcək tədbirlərə 10 milyon avronun xərclənməsi və Avropanın "mədəniyyət səfirləri" tərəfindən bütün dünya dövlətlərinə səfərlərin təşkil edilməsi nəzərdə tutulub. Aİ-nin mədəniyyət məsələləri üzrə komissarı Yan Fiqel 2008-ci ilin "Mədəniyyətlərarası dialoq ili" elan edilməsi ilə bağlı artıq Brüsseldə silsilə tədbirlərin keçirilməsinə start verildiyini bildirib. Bu il ərzində bir sıra mühüm proqramların həyata keçiriləcəyini qeyd edən komissar deyib: "Mədəniyyətlərarası dialoq fərqli dəyərlərə sahib olan insanların bir-birilərini daha yaxşı anlaması və qarşı-qarşıya yaşamaq əvəzinə birlikdə yaşaması deməkdir. Bu isə milli, regional və dini qrupların mədəni baxımdan bütünləşməsini özündə əks etdirir. Belə bir məkan yaratmağı bacaracağımıza inanır və hamını bu çərçivədə əməkdaşlığa dəvət edirəm". Aİ mədəniyyətlərarası dialoqu gücləndirmək üçün 7 böyük layihəyə start verəcək. İlk layihə çərçivəsində orta məktəb şagirdləri üçün bu istiqamətdə müxtəlif mövzularda və özündə birlik mesajlarını əks etdirən tədbirlərin keçirilməsi nəzərdə tutulur. Qeyd edək ki, bu layihə daxilində tədbirlərin keçirildiyi bölgələrdə yerli və xarici sənət adamlarının iştirakı ilə müxtəlif dillərdə mahnı, hekayə müsabiqələri və konsertlərin təşkili də planlaşdırılır. Son nəticədə müsabiqələrin qalibləri Brüsseldə keçiriləcək final mərhələsində iştirak edəcəklər. Layihənin təşkilatçılarından - Yəhudi Menihun Fondu ndan Frederik Çabaud qeyd edib ki, birlik və bərabərlik mesajlarının veriləcəyi tədbirlərdə bəzən 30 millətin nümayəndələrinin təmsil olunduğu auditoriyalara baş çəkəcəklər.

Aİ-dən verilən məlumata görə, "Mədəniyyətlərarası dialoq ili" çərçivəsində həyata keçirilməsi planlaşdırılan tədbirlər üçün qurum tərəfindən ayrılan 10 milyon avronun 6 milyonu İttifaq üzvü olan ölkələrdə keçirilən proqramlar üçün xərclənəcək. 4 milyon avro isə dialoq ilinin reklam və təqdimatına yönəldiləcək. Eyni zamanda Avropanın müxtəlif şəhərlərində bir çox sahələri əhatə edən sərgilər keçiriləcək. Həmçinin aralarında məşhur braziliyalı yazar Paulo Koelonun da yer aldığı "Aİ-nin mədəniyyət səfiri" rolunu ifa etmək niyyətində olan 7 nəfərlik heyətin bu istiqamətdə dünya ölkələrinə səfərləri təşkil ediləcək. Paulo Koeloya görə, Avropa mədəniyyətləri arasındakı bu dialoq dünyanın başqa regionlarına da təsirsiz qalmayacaq: "Ümid edirəm ki, başladığımız fəaliyyət dünyada tolerantlığın artırılmasına da öz töhfəsini verəcək. Bu layihənin təsirinin Çin və ya Tailanda qədər gedib çıxmasına şübhəm yoxdur".

Qeyd edək ki, Avropada "mədəniyyətlərarası dialoq" termini Amerikada "mədəniyyətlərarası qarşıdurma" tezisinin ortaya çıxmasından sonra gündəmə gəlib. Bu məsələ 2005-ci ildə beynəlxalq ictimaiyyətin xüsusi diqqət mərkəzində olub. Həmin il bu istiqamətdə "Mədəniyyətlər ittifaqı" layihəsi də ortaya atılıb. İspaniya və Türkiyə baş nazirlərinin bu layihəyə rəhbərlik etməsinə Avropanın əksər dövlətlərindən olan nümayəndələr razılıq veriblər.

Palitra.- 2007.- 11 dekabr.- S. 6.