"Cavid ömrü" bədii filmi "iblisəmi uymuşdu bəsəriyyət?" sualına tam cavab verir

Dekabrın 13-də Teatr Xadimləri İttifaqının səhnəsində böyük mütəfəkkir Hüseyn Cavidə həsr olunmuş "Cavid ömrü" filminin premyerası olmuşdur.

Tədbirdə Mədəniyyət və Turizm naziri Əbülfəs Qarayev bildirmişdir ki, ötən əsrin 30-cu illərində törədilən qanlı repressiya söz, sənət xadimlərinə, işıqlı təfəkkür sahiblərinə qənim kəsilmişdi. Repressiya qurbanlarından biri də dramaturq, pedaqoq, görkəmli şair Hüseyn Cavid olmuşdur. Bu gün nümayiş etdirilən "Cavid ömrü" bədii filmi unudulmaz şəxsiyyətin ömrünün, taleyinin, iztirablarının, cəfalarının təsvirini özündə əks etdirir.

Nazir demişdir ki, rəhbərlik etdiyi qurum tərəfindən araya-ərsəyə gətirilmiş film ilk olaraq H.Cavidin ad günündə dünyaya göz açdığı Naxçıvanda nümayiş etdirilmişdir.

Tədbirdə, ekran əsərinin ssenari müəllifi, xalq yazıçısı Anar, filmin quruluşçu rejissoru, xalq artisti Ramiz Həsənoğlu çıxış edərək bildirmişlər ki, burada təsvir edilmiş kadrlar, təsvirlər, hadisələr inandırıcı şəkildə lentə alınmışdır. Tamaşaçılar 70 il əvvəl baş verən qanlı olaylara qüssəli, kədərli, amma həyat həqiqəti təki baxacaq, ulu şairin düçar olduğu dərdə mənən, ruhən şərik çıxacaqlar.

Sonra film nümayiş etdirilmişdir.

Filimdə Hüseyn Cavid obrazını xalq artisti, Rasim Balayev şairin sədaqətli ömür-gün yoldaşı Mişkinaz xanımın rolunu aktrisa Dilarə Əliyeva, Mircəfər Bağırov obrazını xalq artisti Ramiz Novruzov yaratmışlar.

Ekran əsərində boyük sevgi ilə yaşayıb-yaradan Hüseyn Cavidin, onun qələm dostlarının - Əhməd Cavadın, Mikayıl Müşfıqin, Abbas Mirzə Şərifzadənin, Salman Mümtazın və başqalarının başları üstündə Domokl qılıncı kimi asılan sərt rejim haqlı olaraq tamaşaçılar tərəfindən nifrətlə qarşılanmışdır. Tarixi həqiqətlərə uyğun çəkilmiş bu ekran əsərində tamaşaçı Hüseyn Cavidi ağır, dözülməz vəziyyətdə də müdrik, dərin düşüncəli, dözümlü görür. Zamanın iztibarlarına, məşəqqətlərinə tab gətirmiş, əyilməmiş, sınmamış Mişkinaz xanımın, Ərtoğrolun, Turan xanımın ən çətin məqamlarda belə qürurlu olmaları diqqət çəkir. Filim "İblisəmi uymuşdu bəşəriyyət?" sualına tam dolğun cavab verir.

Respublika.- 2007.- 14 dekabr.- S. 8.