İbrahimova S.

Təhminənin gündəliyi 30 il sonra

Günel Anarqızının təqdimatında

"Zaur 30 ildən sonra Təhminəni görür. Əynindəki ağ iridüyməli libası Təhminənin 30 il əvvəlki geyimi idi. Təhminənin qara saçları, siması təravətini itirməmişdi. Dəyişən yalnız zaman idi. Zaur Təhminənin adını çəkmək istəyərkən, o üzünü çevirib gedir. Bir azdan o, Təhminəni yenidən görür, bu dəfə onlar metroda qarşılaşırlar. Bu dəfə Təhminə qırmızı donunda idi. Qəfil yoxa çıxan Təhminə yol boyu müxtəlif yerlərdə Zaurun diqqətini çəkir. Bir azdan liftə minən Zaur bu dəfə Təhminə ilə orada qarşılaşır. Özündən biixtiyar liftin 6-cı düyməsinə toxunmaq istəyir. Bu zaman ona ayan olur ki, həmin binanın 6-cı mərtəbəsi yoxdur. Yenidən birinci mərtəbəyə qayıdan Zaur üz tutur Təhminənin dəfn olunduğu qəbiristanlığa. Qəbirin ətrafının kol-kos basdığını görən Zaur başa düşür ki, Mədinə və Muxtarın ölümündən sonra Təhminəyə baş çəkən olmayıb".

34 ildən sonra Anarın "Beşmərtəbəli evin altıncı mərtəbəsi" əsərinin motivləri əsasında yeni "Altıncı" adlı MP3 formatlı SD işıq üzü görüb. Audio-kitabın müəllifi Günel Anarqızı, bəstəkarı Emil İbrahim, üz qabığının müəllifi, rəssam Yusif Mirzə, səs reyissoru Rafiq Hacıyevdir.

Müəllifin etirafına inansaq, Təhminənin gündəliklərini təşkil edən əsərin ideya müəllifi atası, Xalq yazıçısı Anar olub. İlk bədii əsərin iki ekran həlli, teatr versiyasından sonra o, əsərə qayıdışının səbəblərini "Yazz Centre"də keçirilən audio-kitabın təqdimat mərasimində açıqladı. Nərgiz Cəlilovanın təqdimatı ilə səhnəyə çıxan G.Anarqızı öncə bunları dedi: "Əsəri xaricdə səfərdəikən yazmışam. Əvvəlcə atamın ideyasına tərəddüd edirdim. Lakin onun fikirləri məni bədii yaradıcılığa həvəsləndirdi. Düşündüm ki, hadisələr 3-cü şəxsin vasitəsi ilə açılmalıdır. Lakin Təhminənin dili ilə danışmaq mənə asan başa gəlmədi. Nəhayət, əsər tamamlandı. Onu səsləndirmək aktrisa Mehriban Zəkiyə həvalə olundu".

M.Zəkinin əlavəsinə görə, Təhminənin gündəliklərini nəql etmək üçün o, Təhminə olmalı idi: "Amalya Pənahova, Sənubər İsgəndərli və Meral Konratdan sonra yaş etibarı ilə özümü Təhminə olaraq görə bilmirdim. Saat yarımlıq zaman çərçivəsində mən Təhminənin yaşantıları və çırpıntılarını ifadəmlə göstərməli idim. Güman edirəm ki, bunun öhdəsindən gələ bilmişəm".

Amaliya Pənahova, Fuad Poladov, Sənubər İsgəndərli, Elxan Cəfərov, Zülfiyyə Xanbabayeva, Fəxrəddin Manafov, Ramiz Fətəliyev səhnədə onlar üçün ayrılmış masaya əyləşərək ekranda yaratdıqları "Təhminə və Zaur"dan danışdılar. Xatırladaq ki, Z.Xanbabayevanın sonuncu klipi Anarın əsərinin motivləri əsasında çəkilib və orada Fəxrəddin Manafovla Meral Konrat Ramiz Fətəliyev və Fuad Əlişovun reyissor yozumunda obrazı yenidən canlandırıblar.

Atasının təcili Türkiyəyə yola düşdüyünü diqqətə çatdıran G.Anarqızı gecənin xeyir-duasını Vaqif Səmədoğlundan aldı. Hamının içində öz Təhminəsi və ya Zaurunun olduğunu deyən qələm adamı öz Təhminələrinin qarşısında baş əydiyini söylədi. Günelin yaradıcılığını yüksək qiymətləndirən V.Səmədoğlu: "İnanıram ki, o, bizi bundan sonra da maraqlı əsərləri ilə təəccübləndirəcək" dedi.

Tədbirin sonuna yaxın təşkil edilən viktorina əsərlə bağlı bəzi məqamları oxucularına xatırlatmaqla yanaşı, onlara müxtəlif hədiyyələr və "Təhminə" adlı eksklüziv ətiri qazandırdı.

Xatırladaq ki, "Altıncı" diski bu həftədən etibarən satışa çıxarılacaq

Kaspi.- 2007.- 25 dekabr.- S. 17.