Ayxan

 

Qaliblər mükafatlandırıldı

 

II Milli Turizm Filmləri Festivalının Qran-Prisi Qızıl səyyah Küsnətə qismət oldu

 

Dünən Bakıda II Milli Turizm Filmləri Festivalının (MTFF) qaliblərinin mükafatlandırma mərasimi keçirilib.

APA-nın məlumatına görə, dekabrın 10-da start götürən festivalda 37 film nümayiş etdirilib. Festivalın "Qran-Pri" - "Qızıl səyyah" mükafatına Əli İsa Cabbarovun "Küsnət" filmi (3 min manat), ən yaxşı sənədli mənzərə filmi mükafatına Rəhim Tanrıverdiyevin "Quş adasında bir gün" filmi (1000 manat), ən yaxşı etnoqrafiya filmi mükafatına İqbal Məmmədəliyevin "Zəhmətlə yoğrulanlar" filmi (1000 manat), ən yaxşı rejissor işi mükafatına "Qala" filminin rejissoru Rövşən İsgəndərov (1000 manat), ən yaxşı televiziya verilişi mükafatına rejissor Mirsadıq Ağazadənin "Bakinskiye taynı" verilişi (1000 manat), ən yaxşı reklam çarxı mükafatına Elşən Əliyevin "Bakı gecələri" reklam çarxı (1000 manat), ən yaxşı operator işi mükafatına "Qədim Azərbaycan" filminin operatoru Rəşad Nuriyev (1000 manat) layiq görülüb. Festivalda 3 həvəsləndirici mükafat da təqdim olunub.

Qeyd edək ki, müsabiqənin münsiflər heyətində Oqtay Mirqasımov, Nizami Abbas, Nəsimi Əliyev, Oqtay Babazadə, Cavid İmamverdiyev, Toğrul Əfəndiyev və Larisa Cavanşir təmsil olunub. Festival Azərbaycanın turizm imkanlarını nümayiş etdirən filmlərin təbliği və turizm mövzusunda film istehsalının təşviqi, bu sahədə fəaliyyət göstərən kino və televiziya ustalarının yaradıcı əməyinin stimullaşdırılması, eləcə də ictimaiyyətin turizm sahəsinə diqqətinin artırılması məqsədilə keçirilib.

 

Ekspress.- 2007.- 15-17 dekabr.- S. 20.