Bilal Əliyevin yeni mükafatı

Əməkdar artist Bilal Əliyev "El gücü" Beynəlxalq Humanitar Assosiasiyası tərəfindən "El atası" qızıl döş nişanı və diplomuna layiq görülüb. Aldığı mükafatdan fərəhlənən müğənni bundan sonra da xalqın etimadını doğruldacağını, sənəti ilə daim Azərbaycanın adını uca tutacağını deyir: "El atası" qızıl döş nişanı 1999-cu ildən bu günə kimi cəmi 10 şəxsə verilib. Bu il də yalnız mənə nəsib oldu. Onu da bilirəm ki, mükafatı mədəniyyət işçilərindən Xalq artisti, professor Arif Babayev alıb".

Qeyd edək ki, qızıl döş nişanı Azərbaycanın milli bayrağı və 8 guşədən ibarətdir. Guşənin mərkəzində ümummilli lider Heydər Əliyevin şəkli öz əksini tapıb.

Əməkdar artist indiyədək bir sıra mükafatlara və diplomlara layiq görüldüyünü xatırladır. Bunlardan önəmlisinin məhz Heydər Əliyevin ona verdiyi fəxri ad olduğunu deyir. Növbəti yeri isə "El atası" tutur: "Bəzi sənətçilər bir neçə mükafata layiq görüləndən sonra yerə-göyə sığmır, öyünməyə başlayır. Hər yerdə "artıq öz sözümü demişəm" deyir. Bir sözlə, "mənəm-mənəm" kəlməsi dilindən düşmür. Mən isə belə xüsusiyyətdən uzağam. Həmişə sadə olmağımla seçilmişəm".

Yeni il axşamı ilə bağlı yaradıcılıq sifarişlərinin çox olduğunu deyən B.Əliyev bayramı tamaşaçıların qarşısında keçirməyə qərar verib. Yanvarın 1-də isə o, ailəsilə bir yerdə yeni ili qeyd edəcək. 2007-ci ili həyatında uğurlu hesab edən sənətkar deyir ki, çəkdiyi bütün əziyyətlərin bəhrəsini məhz bu il görüb.

Kaspi.- 2007.- 25 dekabr.- S. 17.