İntiqam N.

Şou biznesdəki vəziyyəti tənzimləmək üçün Mədəniyyət haqqında

qanuna dəyişiklik edilməlidir

Mənəvi sərvətlərimizi qorumaq, təbliğ etmək, gələcək nəsillərə ötürmək hər birimizin borcudur .

Millət vəkili, Milli Məclisin Mədəniyyət məsələləri daimi komissiyasının üzvü Jalə Əliyeva hesab edir ki, Mədəniyyət haqqında qanuna müəyyən düzəlişlərin edilməsi zamanın tələbidir və hazırda Mədəniyyət Nazirliyi ilə birgə bununla bağlı müzakirələr aparılır. Onun fikrincə, təkliflər reallaşsa, şou-biznesə nəzarət güclənər və mövcud narazılıqlar aradan qalxar.

- Jalə xanım, istərdim söhbətimizə seçicilərin problemlərinin həlli istiqamətində gördüyünüz işlərlə başlayaq.
- Əvvəla onu qeyd edim ki, 92 saylı Zərdab-Ucar seçki dairəsindən millət vəkili seçilmişəm. Kampaniya vaxtı üzərimə götürdüyüm öhdəliklərin bir çoxu artıq yerinə yetirilib. Ən azından seçicilərim çətin anlarında döyə biləcəkləri qapının olduğuna inanıblar...
Bu günə qədər rayonda həlli vacib olan bir neçə ciddi problem vardı və mən bununla bağlı fəaliyyət planı hazırlamışdım. Ən birinci gördüyüm iş bu oldu ki, rayonda şəhidlərin xatirələrini əbədiləşdirmək üçün abidə-kompleks hazırlandı. Daha sonra ikinci bir məsələ rayon gəncləri üçün yeni stadionun inşa edilib, istifadəyə verilməsi oldu. Bundan əlavə, yerli icra strukturlarının köməkliyi ilə seçicilərin işıq, su, yol və digər problemləri həll edildi. Hazırda isə Həsən bəy Zərdabinin adını daşıyan park yenidən qurulur.

- Sizə elə gəlmir ki, təmsilçisi olduğunuz rayonda son vaxtlar quruculuq işləri sanki bir az səngiyib?
- Bu gün Azərbaycanın əksər rayonlarında quruculuq işləri ən yüksək şəkildə davam etdirilir. Amma bir məqamı da qeyd etmək istəyirəm. Bəzən millət vəkilinin görəcəyi işlə icra orqanının görəcəyi iş qarışdırılır. Yəni o şeyə icra orqanı cavabdehdirsə, ona əslində millət vəkili müdaxilə etməməlidir. Çünki bunun üçün dövlətin özünün proqramı, layihələri var, müəyyən məbləğdə vəsait ayrılıb və s.. Belə olan təqdirdə, millət vəkilinin seçici üçün görəcəyi ən böyük iş qanunların qəbul olunduğu bir məkanda, Milli Məclisdə öz sözünü deməsindən ibarət ola bilər. Bu baxımdan yanaşanda Milli Məclis son bir neçə ildə 200-dən çox qanun qəbul edib və mən də bununla bağlı öz irad və təkliflərimi səsləndirmişəm. Konkret olaraq, siz deyən məsələyə gəlincə, mənə belə gəlir ki, seçicilərim qarşıdakı illərdə rayonda daha böyük quruculuq işlərinin şahidi olacaqlar...

- Milli Məclisdə hansı komissiyaların üzvüsünüz?
- Milli Məclisin Mədəniyyət Məsələləri daimi komissiyasının, Qara Dəniz İqtisadi Əməkdaşlıq Təşkilatının Parlament Assambleyasının, Türkiyə-Azərbaycan Parlamentlərarası Dostluq Qrupunun üzvüyəm. Hər üç istiqamətdə görülən işlərlə bağlı müəyyən fəaliyyətlərim var.

- Yeri gəlmişkən, mədəniyyət məsələləri daimi komissiyası Azərbaycan şou-biznesindəki bu dərəbəyiliyin qarşısını almaq üçün hansı addımları atmağı planlaşdırır?
- Azərbaycanda mədəniyyətlə əlaqədar qanun 10 il öncə qəbul edilib. Lakin uzun müzakirələrdən sonra qərara alındı ki, bu məsələyə bir daha qayıdılsın. Çünki açıq-aşkar bəlli olur ki, bu qanunda zamanın tələbinə uyğun olaraq müəyyən boşluq yaranıb ki, bu da şou-biznesdəki vəziyyətlə əlaqədardır. Qərara gəldik ki, Mədəniyyət Nazirliyi ilə birgə bu qanun yenidən işlənilsin və həmin boşluqlar, cəmiyyəti, ziyalıları narahat edən məsələlər aradan qaldırılsın. Düzdür, hər zamanın öz tələbi var. Əslində şou-biznes bəlkə də bu günün tələbidir. Ancaq bir məqam da var ki, biz gələcəyə bu yolla, şou-bizneslə gedə bilmərik. Biz gələcəyə iki gün dəbdə olan, sonradan unudulan musiqilərlə gedə bilmərik. Bizim xalqımızı hər zaman qoruyan, dünyada tanıdan onun mənəvi sərvətləri olub. Həmin mənəvi sərvətləri qorumaq, təbliğ etmək, gələcək nəsillərə ötürmək hər birimizin borcudur. Bunun üçün də Mədəniyyət haqqında qanuna dəyişiklik edilməsi nəzərdə tutulur. Layihənin üzərində iş gedir və gələcəkdə bu barədə cəmiyyətə konkret məlumatlar veriləcək.

- Bir neçə gün öncə Milli Məclisdə 2008-ci ilin Dövlət Büdcəsi haqqında qanun layihəsi təsdiq olundu. Bir millət vəkili kimi 2008-ci il üçün Dövlət Büdcəsindən nələr gözləyirsiniz?
- Büdcə parlamentdə qızğın müzakirələrə səbəb oldu. Demək olar ki, hər bir millət vəkili büdcə ilə əlaqədar öz fikrini, rəyini bildirdi. Yaxından tanış olanda məlum oldu ki, büdcə çox dərindən işlənilib və ən əsası şəffaflığın təmin olunması üçün bir çox yeniliklər edilib. Sadə bir misal deyim: əvvəllər Dövlət Büdcəsi haqqında qanun layihəsi bir neçə səhifədən ibarət sənəd idisə, indi bir neçə yüz səhifədən ibarətdir.  Burada gəlirlər və xərclər barədə ictimaiyyətə yetərincə məlumat verilib. Büdcədəki artımlar bütün sahələri əhatə edir. Bu isə təbii ki, Prezidentin uğurlu iqtisadi siyasətinin nəticəsidir. Ümid edirəm ki, qarşıdakı illərdə biz büdcədə daha geniş inkişafın şahidi olacağıq. Müəllimlərin, səhiyyə, mədəniyyət işçilərinin əmək haqlarının artırılmasına ehtiyac var. Mədəniyyət komissiyasının üzvü kimi kitabxana, teatr işçilərinin əməkhaqlarının artırılması məsələsi də bir neçə dəfə tərəfimdən səsləndirilib. Bir məqamı unutmayaq ki, bu insanlar ancaq maaşla dolanırlar və başqa gəlir yerləri yoxdur.

- Milli Məclisdə millət vəkilləri var ki, seçildikləri 5 il ərzində bir dəfə də olsun çıxış etmir, hər hansı məsələyə münasibət bildirmirlər. Sizcə, bu nə ilə əlaqədardır?
- Ümumiyyətlə, bir millət vəkilinin danışması, münasibət bildirməsi arzuolunandır. Ən azından seçicilər bunu ondan gözləyirlər. Ancaq bu fakta birtərəfli yanaşmaq da doğru olmaz. Bunun da obyektiv və subyektiv səbəbləri var. Əslində qanun qəbul edilərkən millət vəkilinin öz səsi ilə münasibət bildirməsi, lehinə və yaxud əleyhinə olması elə onun artıq bir fəaliyyəti deməkdir. Yəni bunun üçün o ən azından qanunla tanış olur. Adını çəkmək istəmirəm, bizim bir xalq şairimiz var. Onun çox gözəl şeirləri var. Ancaq bu insan özü də etiraf edir ki, danışmağı bacarmır. Natiqlik də bir qabiliyyətdir. İstənilən halda düşünürəm ki, millət vəkili fəal olmalıdır. Əgər millət vəkili xalqın səsini dövlətə çatdıran bir insandırsa, verilən imkandan istifadə edib, daha çox işlər görməlidir.

- Həsən bəy Zərdabinin 170 illik yubileyinin dövlət səviyyəsində qeyd olunması ilə bağlı parlamentdə məsələ qaldırmışdınız. Bu istiqamətdə hansı işlər görülür?
- Bununla bağlı dövlət qurumlarına, həmçinin prezident İlham Əliyevə müraciət etmişəm. Ümid edirəm ki, bu məsələ tezliklə öz həllini tapacaq. Sadəcə olaraq, burada bir məsələ ilə bağlı zərdabişünaslar arasında fikir ayrılığı yaranıb. Yəni araşdırmaçılar konkret fikrə gələ bilmirlər ki, Zərdabinin 165 illiyidir, yoxsa 170 illiyi?..
Arxiv sənədlərində bu tarixlərin hər ikisi göstərilir. Hər iki rəqəmə istinad edən tərəflər var. Bu mübahisənin həll edilməsi və konkret rəqəmlərin göstərilməsi artıq alimlərin işidir. Yəqin ki, onlar tezliklə bu məsələdə ortaq məxrəcə gələ biləcəkər. Onu da qeyd edim ki, alimlər arasında Zərdabinin 170 illiyinin olduğunu bildirənlər daha çoxdur. Ədibin həyat yoldaşı Hənifə xanımın xatirələri də bunu təsdiqləyir. Zərdabi, sadəcə olaraq, bir alim, bir yazıçı deyil, öz dövrünün, bu günün, gələcəyin ziyalısıdır. Ümid edirəm ki, öz dövrünün digər ziyalıları kimi, o da yaxın gələcəkdə öz layiqli qiymətini alacaq.

Zaman.- 2007.- 6-7 dekabr.- S. 9.