II tura 35 vokalçı keçdi

Onlardan yeddisi Azərbaycan təmsilçisidir

Azərbaycan Dovlət Filarmoniyasında keçirilən Vokalçıların Bülbül adına IV Beynəlxalq Müsabiqəsinin II turuna 69 vokalçıdan 35-i vəsiqə qazanıb. Bu barədə APA-ya Bakı Musiqi Akademiyasının rektoru, xalq artisti, müsabiqənin münsiflərindən biri Fərhad Bədəlbəyli məlumat verib. II tura vəsiqə qazanan 35 vokalçıdan 7-nin Azərbaycan təmsilçisi olduğunu vurğulayan F.Bədəlbəyli II turun dekabrın 2-də bitəcəyini deyib.

Qeyd edək ki, müsabiqə Mədəniyyət və Turizm Nazirliyi, Beynəlxalq Bülbül Fondu, Beynəlxalq Musiqi Xadimləri İttifaqının təşkilatçılığı ilə keçirilir. Müsabiqənin münsiflər heyətində Beynəlxalq Musiqi Xadimləri İttifaqının prezidenti, SSRİ xalq artisti, Sosialist Əməyi Qəhrəmanı, dövlət mükafatları laureatı, akademik İrina Arxipovanın sədrliyi ilə Bakı Musiqi Akademiyasının rektoru, professor Fərhad Bədəlbəyli, SSRİ xalq artisti, Qazaxıstan prezidentinin şəxsi qızıl nişanı ilə təltif olunmuş Bibigül Gülegenova, SSRİ və Qırğızıstanın xalq artisti Vladislav Pyavko, İtaliyanın tanınmış müğənnisi maestro Cüzeppe Pastorole, Ukraynanın xalq artisti Mariya Yuriyevna Stefyuk, Gürcüstanın xalq artisti Nodar Davidoviç Andquladze, Almaniyada keçirilən Opera Sənəti festivalının rəhbəri Korneliya Fon Kerssenbrok, tanınmış Belarus müğənnisi Oleq Melnikov, Serbiya Milli Operasının solisti, əməkdar artist Branislav Yatiç, xalq artisti Firəngiz Əhmədova təmsil olunub. Dekabrın 6-da yekunlaşacaq müsabiqəyə Belarus, Gürcüstan, Qazaxıstan, Özbəkistan, Rusiya, Türkiyə, Ukrayna və Azərbaycandan vokalçılar qatılıb. Müsabiqədə Qran-Pri mükafatı 10 min dollar, I mükafat 5 min dollar, II mükafat 3 min dollar, III mükafat 2 min dollar, IV mükafat 1000 dollar məbləğində nəzərdə tutulub. Bununla yanaşı, müsabiqə iştirakçıları arasında ən yaxşı tenor, Bülbülün repertuarından Azərbaycan bəstəkarlarının əsərlərinin ən yaxşı ifaçısı, xalq mahnılarının ən yaxşı ifaçısı seçilərək xüsusi priz və mükafatlarla təltif olunacaqlar.

Ekspress.- 2007.- 1-3 dekabr.- S. 20.