Qadir T.

Mədəniyyət və incəsənət xadimlərinin əməkhaqqında artım gözlənilir

Lisenziya almayan mehmanxanalar bağlanacaq

Dünən mədəniyyət və turizm naziri Əbülfəs Qarayev cari ilin yekun nəticələrinə dair mətbuat konfransı keçirib. İlin son ayında keçiriləcək tədbirlərlə bağlı məlumat verən nazir əvvəlcə qeyd olunması nəzərdə tutulan yubiley tədbirlərindən danışıb. Belə ki, dekabrın 13-də “Cavid ömrü” filminin kütləvi auditoriya üçün ilk baxışı, 27-də isə Hüseyn Cavidin yubileyinin yekun tədbiri keçiriləcək. Bu yaxınlarda Liviyanın paytaxtı Tripoli şəhərində İslam ölkələrinin mədəniyyət nazirlərinin 5-ci konfransı və Kolumbiyada ümumdünya turizm təşkilatının növbəti baş assambleyasının toplantısında iştirak edən Ə.Qarayev görüşlərdə müzakirəsi olunan bir sıra təkliflər barədə də açıqlama verib. Dünya turizm bazarının 2020-ci ilə qədər ən azı 20-25 faiz artacağı qənaətində olan nazir bunun müqabilində Azərbaycan turizm sənayesinin qarşısında ciddi vəzifələrin dayandığını söyləyib: “Potensialımızdan daha geniş istifadə etməliyik. Nazirlik bu gün işlərini məhz bu istiqamətdə quraraq 2008-ci və 2017-ci illəri əhatə edən turizm dövlət proqramının qəbul olunması üçün hazırlıq işlərini tamamlayıb”. Gələn ilin sentyabrında Bakıda Avropanın Mədəni İrs günlərinin keçiriləcəyini deyən nizir bu tədbirin Avropanın iki ölkəsində hər il həyata keçirildiyini qeyd edib. “Avropanın Mədəni İrs Günləri növbəti il yəqin sonuncu dəfə bu metodika ilə baş tutacaq. Mədəni İrs Günləri çərçivəsində bir sıra ölkələrdən Bakıya çoxlu qonaqlar gələcək. Artıq tədbirin Bakıda keçirilməsi üçün hazırlıq işləri görülür. Bildiyiniz kimi, tarixi - mədəni abidələrin də vəziyyətinin yaxşılaşdırılması vacib məsələlərdən biridir”. Nazirin sözlərinə görə, 2008-ci ildə Avropa səviyyəsində irimiqyaslı mədəniyyət konfransının keçirilməsi də planlaşdırılır. İslam Konfransı Təşkilatına üzv dövlətlərin mədəniyyət nazirlərinin 6-cı İslam Konfransının Bakıda keçiriləcəyini deyən Əbülfəs Qarayev artıq qərarın qəbul olunduğunu deyib. Həmçinin, Bakının 2009-cu il üçün İslam Mədəniyyətinin paytaxtı elan olunduğunu vurğulayıb. Buna görə də həmin il Novruz bayramı daha geniş və təntənəli şəkildə qeyd olunacaq. Ə.Qarayev noyabr ayının 28-29-da Qazaxıstanın paytaxtı Astanada keçirilməsi nəzərdə tutulan və təxirə düşən TÜRKSOY mədəniyyət nazirlərinin 24-cü toplantısının dekabrın sonlarında baş tutacağının gözlənildiyini deyib: “Toplantının vaxtı hələlik dəqiqləşdirilməyib. Dekabrın sonunda bu tədbirin baş tutacağına ümid edirəm. TÜRKSOY-un fəaliyyətinin zəifləməsi bizi narahat edir. Qurumda daxili atmosfer heç də ürəkaçan deyil. Ona görə də biz təcili görüş keçirməli, problemləri həll etməli və yeni sədr seçməliyik. Sözsüz ki, TÜRKSOY-un işinin gücləndirilməsi gündəmdə olan önəmli məsələlərdən biridir”.

Cari ilin sonuna kimi lisenziyalaşdırılmayan mehmanxanalar üçün görüləcək tədbirlərə aydınlıq gətirən nazir artıq sahibkarlara ciddi şəkildə xəbərdarlıqların oldunduğunu söyləyyib. “Bu, çox ciddi problemdir. Lisenziya almayan mehmanxanalar bağlanacaq. Bu qərar hələ yanvarın əvvəllərinə qədər qüvvədədir. Lisenziyaların alınmasını gecikdirən mehmanxanalarin fəaliyyəti dondurulacaq. Onlar bizim işimizi nə qədər ləngitsə, biz də sonradan onların lizenziyalaşdırma işlərini tələsmədən aparcağıq”. Gələn il mədəniyyət və incəsənət xadimlərinin əməkhaqqında artım da gözlənilir. Fəxri adların verilməsi də tədricən başqa bir formaya keçəcək. 

Yeni Azərbaycan.- 2007.- 11 dekabr.- S. 8.