Dünya şöhrətli müğənni Bülbülün 110 illik yubileyinə həsr olunmuş gecə

Dekabrın 7-də Azərbaycan Dövlət Akademik Opera və Balet Teatrında dövlət və hökumət nümayəndələrinin, tanınmış sənət adamlarının, musiqiçilərin və gənc sənətçilərin iştirakı ilə Azərbaycan vokal sənətinin inkişafında mühüm rol oynamış dünya şöhrətli müğənni, SSRİ xalq artisti, Dövlət mükafatı laureatı, professor Bülbülün 110 illik yubileyinə həsr olunmuş gecə keçirilmişdir.
Teatrın foyesində ölməz sənətkarın həyat və yaradıcılığını əks etdirən fotosərgi təşkil olunmuşdu.
Gecədə mədəniyyət və turizm naziri Əbülfəs Qarayev bildirmişdir ki, Azərbaycan professional vokal məktəbinin banisi olan Bülbül gənc ifaçıların yetişməsinə, püxtələşməsinə böyük əmək sərf etmişdir. Məlahətli səsi ilə könül oxşayan bu böyük opera müğənnisi Azərbaycanın dilbər guşəsi Şuşada dünyaya göz açmışdır.
Nazir vurğulamışdır ki, Azərbaycan xalq mahnılarının, təsniflərinin, vokal əsərlərinin bənzərsiz ifaçısı Bülbülün ölməz xatirəsi xalqımız tərəfindən daim hörmət və ehtiramla anılacaqdır.
Ə.Qarayev geniş səs imkanlarına malik, ifaçılığında milli vokal üslubu ilə italyan vokal məktəbi ənənələrini üzvi şəkildə birləşdirmiş Bülbülün Azərbaycan mədəniyyətinin inkişafındakı əvəzsiz xidmətlərindən danışmışdır. Nazir ulu öndər Heydər Əliyevin Sərəncamı ilə Bülbülün 100 illik yubileyinin, Prezident İlham Əliyevin müvafiq Sərəncamı ilə isə görkəmli müğənninin 110 illik yubileyinin dövlət səviyyəsində qeyd edilməsinin əhəmiyyətini vurğulamış, orta və ali musiqi məktəblərində keçirilmiş xatirə tədbirlərindən danışmışdır.
Diqqətə çatdırılmışdır ki, vokalçıların Bülbül adına IV beynəlxalq müsabiqəsi başa çatmış və həmin tədbirdə ölməz sənətkarımızın işıqlı xatirəsi dünyanın bir çox ölkələrini təmsil edən 120 gənc ifaçı tərəfindən bir daha anılmışdır. Bülbülün yaratdığı obrazlar tamaşaçılar tərəfindən böyük sevgi və məhəbbətlə qarşılanmışdır. Qeyd edilmişdir ki, Bülbül, həmçinin Azərbaycan milli vokal məktəbi ənənələrinin tədqiqi və Avropa opera mədəniyyəti ilə bu ənənələrin sintezinə dair bir çox sanballı əsərlərin müəllifidir. Böyük sənətkarın təşəbbüsü ilə Dövlət Konservatoriyası nəzdində xalq musiqisini öyrənən elmi tədqiqat kabineti yaradılmışdır. Məhz bu kabinetin fəaliyyəti sayəsində "50 Azərbaycan el mahnısı", "Azərbaycan xalq mahnıları" və digət toplular çap edilmişdir.
Tədbirdə Bülbülün müxtəlif illərdə oxuduğu mahnılar və onun haqqında görkəmli şəxsiyyətlərin söylədikləri dəyərli fikirlər videogörüntü vasitəsilə nümayiş olunmuşdur.
Yubiley gecəsində Bülbül adına IV beynəlxalq müsabiqənin laureatları, SSRİ xalq artistləri Vladislav Pyavko, Mariya Stefyuk, Serbiya Opera və Balet Teatrının solisti Bronislav Yatiç, Belarusun əməkdar artisti Oleq Melnikov və digər tanınmış ifaçılar çıxış etmişlər.

Azərbaycan.- 2007.- 8 dekabr.- S. 5.