Bakıda Mstislav Rostropoviç adına Beynəlxalq Musiqi Festivalı başlanmışdır

Dekabrın 11-də Müslüm Maqomayev adına Azərbaycan Dövlət Filarmoniyasında Mstislav Rostropoviç adına I Beynəlxalq musiqi festivalının açılışı olmuşdur. Səhnənin dərinliyindəki ekrandan maestronun səsi eşidildi. O, Bakıda musiqi festivalı keçirmək arzusunda olması barədə danışırdı.

Təntənəli açılış mərasimini festivalın və Rostropoviç Fondunun prezidenti, görkəmli musiqiçinin qızı Olqa Rostropoviç və Azərbaycanın Mədəniyyət və Turizm naziri Əbülfəs Qarayev davam etdirdilər.

"Doğma Bakıda festival keçirmək atamın çoxdankı arzusu idi" - deyən O.Rostropoviç bu festivalın baş tutması üçün köməklərini əsirgəməmiş insanlara - Heydər Əliyev Fondunun prezidenti, Azərbaycanın birinci xanımı Mehriban Əliyevaya və respublikanın Mədəniyyət və Turizm naziri Əbülfəs Qarayevə təşəkkürünü bildirdi. O.Rostropoviç daha sonra dedi: "Atamın çox sevdiyi və bu festivalın hər hansı başqa bir şəhərdə deyil, məhz Bakıda keçirilməsi üçün əllərindən gələni etmiş daha iki insana təşəkkürümü bildirmək istəyirəm. Onlar bu salonda əyləşən Fatma xanım Abdullazadə və mənim anam Qalina Vişnevskayadır. Atamın arzuları tədricən çin olmaqdadır və mən əminəm ki, Bakının musiqi mədəniyyəti mərkəzinə çevriləcəyi gün uzaq deyil".

Nazir Əbülfəs Qarayev dedi ki, festival Azərbaycan paytaxtının mədəni həyatında yeni bir səhifə açır: Biz bilirik ki, ümummilli liderimiz Heydər Əliyev Mstislav Leopoldoviçin istedadını çox yüksək qiymətləndirirdi və onların yaxın dostluq münasibətləri var. Bu gün Bakıda Leopold və Mstislav Rostropoviçlər adına musiqi məktəbi də, Mstislav Rostropoviç muzeyi də var.

Ümidvarıq ki, bu festival bizim maestroya və onun xatirəsinə səmimi münasibətimizin və sevgimizin daha bir təsdiqi olacaqdır.

Festivalın birinci bölməsində Azərbaycanın xalq artisti Rauf Abdullayevin rəhbərliyi ilə Üzeyir Hacıbəyov adına Azərbaycan Dövlət simfonik orkestrinin ifasında Qara Qarayevin "Yeddi gözəl" baletindən vals və tanınmış pianoçu, əməkdar artist Murad Adıgözəlzadənin ifasında Sergey Raxmaninovun fortepiano ilə orkestr üçün 2-ci konserti səsləndi.

İkinci bölmədə Aleksandr Sokurovun maestro Rostropoviç və onun xanımı haqqında "Həyat elegiyası. Rostropoviç Vişnevskaya" filmi nümayiş etdirildi.

Festival dekabrın 18-dək davam edəcəkdir.

Respublika.- 2007.- 12 dekabr.- S. 10.