Birinci Beynəlxalq Rostropoviç festivalı qala-konsert başa çatdı

Dekabrın 18-də Müslüm Maqomayev adına Azərbaycan Dövlət Filarmoniyasında Birinci Beynəlxalq Rostropoviç musiqi festivalının yekun konserti olmuşdur.
Konsertdən əvvəl maestronun qızı, Rostropoviç Fondunun prezidenti Olqa Rostropoviç çıxış etdi. O, festivalın təşkil edilməsinə və keçirilməsinə görə minnətdarlığını bildirdi, Azərbaycan Prezidenti İlham Əliyevə və ölkənin birinci xanımı Mehriban Əliyevaya bu tədbiri dəstəklədiklərinə görə ürəkdən təşəkkür etdi. O.Rostropoviçin dediyinə görə, atasının bütün həyatı musiqiyə həsr edilmişdi. O deyirdi ki, musiqi insanlara məxsusdur. Onun həyat fəlsəfəsi belə idi: insanlara nə qədər musiqi versən, onlardan bir o qədər sevgi alarsan. Buna görə də yəqin bilirəm ki, atamın doğma şəhəri Bakıda onu heç vaxt unutmayacaqlar. Qeyd edildi ki, Rostropoviç festivalının keçirilməsi üçün dünyanın bir sıra ölkələrindən dəvətlər alınmışdı, lakin bu festivalın Bakıda keçirilməsi barədə qərar çoxdan, Mstislav Rostropoviçin özü tərəfindən qəbul edilmişdi və bu qərardan dönmək olmazdı.
Olqa Rostropoviç maestronun köhnə dostu, "Karrera ənd Karrera" zərgərlik şirkətinin yaradıcısı Manuel Karreranı səhnəyə dəvət etdi. M.Karrera öz qısa çıxışında M.Rostropoviç haqqında xatirələrini danışdı və şirkətin ən yaxşı ustaları tərəfindən hazırlanmış suveniri - miniatür ölçülü qara royalı maestronun qızına təqdim etdi. O.Rostropoviç dedi: "Suveniri hökmən Mehriban xanım Əliyevaya çatdıracağam".
Konsertdə dirijor Y.Konnunun rəhbərliyi ilə Üzeyir Hacıbəyov adına Azərbaycan Dövlət Simfonik Orkestrinin ifasında Azərbaycan və xarici ölkə bəstəkarlarının klassik əsərləri səsləndi.
Azərbaycan Prezidentinin İcra Aparatının Humanitar Siyasət Məsələləri Şöbəsinin müdiri Fatma xanım Abdullazadə, respublikanın mədəniyyət və turizm naziri Əbülfəs Qarayev, M.Rostropoviçin xanımı Qalina Vişnevskaya konsertdə iştirak edirdilər.

Azərbaycan.- 2007.- 19 dekabr.- S. 6.