Mədəniyyət İşçiləri Müstəqil Həmkarlar İttifaqı Respublika Komitəsinin III plenumu keçirilmişdir

Dekabrın 7-də Mədəniyyət işçiləri Müstəqil Həmkarlar İttifaqı Respublika Komitəsinin (MİMNİRK) növbəti III plenumu keçirilmişdir.

Gündəliyə əsasən, tədbir iştirakçıları təşkilati məsələlərə baxmalı, Azərbaycan Həmkarlar İttifaqları Konfederasiyasının qarşıdan gələn III qurultayına nümayəndələr seçməliydilər.

MİMNİRK-nın sədri C.Səttarova "Gənclərlə işin təşkili və MİMNİRK-nın rayon, şəhər və ilk təşkilatlarında onların sosial mənafelərinin müdafiəsi" mövzusunda hesabat məruzəsi ilə çıxış etmişdir. Məruzədə qeyd edilmişdir ki, ümummilli liderimiz Heydər Əliyevin hakimiyyətə qayıdışından sonra gənclərlə iş dövlət siyasətinin mühüm hissəsinə çevrilmişdir. Hazırda bu xətti Prezident İlham Əliyev uğurla davam etdirir. Hər il fevralın 2-də Gənclər günü qeyd olunur. Gənclərlə işi tənzimləyən hüquqi baza yaradılmışdır. Məruzəçi bildirmişdir ki, Gənclər ili elan edilmiş 2006-cı ildə ilk təşkilatlarda gənclərlə iş üzrə 50 komissiya yaradılmışdır.

Plenum gənclərlə iş sahəsində problemlərin öyrənilməsi və həlli, gənclərin sosial mənafelərinin müdafiəsi üçün tədbirlər planı hazırlamağı, gənclər arasında maarifləndirmə işini gücləndirmək məqsədi ilə müntəzəm seminar-müşavirələr keçirməyi, "Gənclər siyasəti haqqında" Qanunun və "Azərbaycan Gəncliyi Dövlət Proqramı"nın (2005-2009-cü illər) yerlərdə icrasına ictimai nəzarəti təmin etməyi qərara almış, MİMNİRK-nın fəaliyyətinin əsas istiqamətlərini müəyyənləşdirmişdir.

Respublika.- 2007.- 8 dekabr.- S. 7.