Turanə

Rostropoviç adına Beynəlxalq Musiqi Festivalına start verilib

Dünən dirijorun fotolarından ibarət sərginin açılışı olub

Ötən gün Dövlət Filarmoniyasında Rostropoviç adına I Beynəlxalq Musiqi Festivalının açılış mərasimi keçirilib. Üzeyir Hacıbəyov adına Azərbaycan Dövlət Simfonik Orkestrinin ifasında bir neçə əsərin səsləndirildiyi tədbirdə Rostrapoviçin həyat yoldaşı Qalina Vişnevskaya və qızı Olqa Vişnevskaya ilə yanaşı, xarici ölkələrdən musiqiçilər də iştirak edib.

Gecədə giriş sözü ilə çıxış edən Olqa Vişnevskaya tədbirin keçirilməsindən məmnun qaldığını bildirib. Mədəniyyət və turizm naziri Əbülfəs Qarayev isə Rostropoviç adına Beynəlxalq Musiqi Festivalının Azərbaycanda ilk dəfə keçirilməsindən bəhs edərək, festivalın ənənə halını alacağına ümid edib.

Dünən isə Muzey Mərkəzində Mstislav Rostropoviçin fotolarından ibarət sərginin açılış mərasimi keçirilib.

Sərgidə çıxış edən mədəniyyət və turizm naziri Əbülfəs Qarayev tədbir iştirakçılarına Bakıda Rostropoviç adına I Beynəlxalq Musiqi Festivalının keçirildiyini bir daha xatırladıb. Sərgidə 170-ə yaxın fotoşəklin nümayiş olunduğunu söyləyən Ə.Qarayev hər bir fotonun özünəməxsus maraqlı tarixçəsi olduğunu deyib. “Burada Mstislav Rostropoviçin uzun müddət ictimaiyyətə çıxarılmayan şəkilləri də sərgilənir. Nümayiş olunan fotoların əksəriyyəti Rostropoviçin Ev Muzeyinə təqdim ediləcək”.

M.Rostropoviçin qızı Olqa Vişnevskaya isə festival və sərginin məhz Bakıda keçirilməsini yüksək dəyərləndirib. Atasının Bakıya mənən bağlı olduğunu deyən O.Vişnevskaya drijorun ölkəmizi hədsiz sevdiyini diqqətə çatdırıb. “Atam sağ olsaydı, əminəm ki, ilk festivalın məhz Bakıda keçirilməsi fikrini dəstəkləyərdi”. M.Rostropoviçin həyat yoldaşı Qalina Vişnevskaya isə festivalın və sərginin yüksək səviyyədə təşkil olunmasından razılıq edib. Q.Vişnevskaya həvəskar fotoqraflar tərəfindən çəkilən və sərgilənən şəkillərin onu valeh etdiyini də gizlətməyib. Xanım Vişnevskaya festivalın ilk dəfə Bakıda təşkil edilməsini Rostropoviçin bu şəhərdə anadan olması ilə əlaqələndirib.

Qeyd edək ki, festival Mədəniyyət və Turizm Nazirliyinin təşəbbüsü və Heydər Əliyev Fondunun dəstəyi ilə həyata keçirilir. Foto-sərgi dekabrın 18-dək davam edəcək.

Yeni Azərbaycan.- 2007.- 14 dekabr.- S. 8.