“Həyat tamaşa kimi...”

Əlil uşaqların Milli Festivalı keçirilib

Rəşid Behbudov adına Mahnı Teatrında "Həyat tamaşa kimi..." İnteraktiv Tamaşaların İkinci Milli Festivalı keçirilib. Kiçik tamaşaların aktyorları iş qabiliyyətini tamamilə və ya qismən itirmiş əlil uşaqlar olub. Tədbirin təşkilatçıları kimi "Müşfiq" Əlil Uşaqlara Yardım ictimai Birliyi, "Müstəqil Həyat inkişaf və Dəstək Mərkəzi", "Göy qurşağı" Reabilitasiya Mərkəzi, "Oriqami" Uşaq və Yeniyetmələrin ictimai Birliyi, "Sən tək deyilsən" Gənc Əlil Qızlara Yardım İctimai Birliyi çıxış edib.

Uşaqlar "Sehirli xalat" kinofilmindən fraqmentlər, M.F.Axundovun, Ü.Hacıbəyovun, Kismet Hüsenin əsərləri əsasında tamaşalar nümayiş etdiriblər ("Turan"). Bu tədbir əlil uşaqlar arasında istedadları aşkara çıxarmaq və onlara özlərini tam qabiliyyətli vətəndaşlar kimi hiss etməyə yardım məqsədilə artıq ikinci ildir ki, keçirilir (ilk dəfə 14 dekabr 2006-cı ildə keçirilib).

Rəsmi məlumatlara görə, Azərbaycanda 413000-dən çox əlil var, onlardan 40000-i uşaqlardır.

Ekspress.- 2007.- 18 dekabr.- S. 13.