Əbülfəs Qarayev: Bu il
mədəniyyət və turizmlə bağlı mühüm
tədbirlərlə əlamətdar olub
Mədəniyyət
və turizm naziri Əbülfəs Qarayev 2007-ci ildə son
mətbuat konfransını keçirib. Ə.Qarayev bu il
ərzində Nazirliyin gördüyü işlər və həyata
keçirdiyi yeni layihələr haqqında jurnalistlərin
suallarını cavablandırıb. O, başa çatan ilin
mədəniyyət və turizm sahəsilə bağlı bir
sıra mühüm tədbirlərlə əlamətdar
olduğunu önə çəkib. Nazir bildirib ki, artıq
ikinci dəfə keçirilən Milli Turizm Filmləri Festivalı
həm turizm sahəsində, həm də milli kinonun
inkişafında mühüm rol oynayacaq. İlk dəfə
təşkil olunan Rostropoviç Festivalı da böyük
önəm daşıyır. İlin sonuna qədər bir
neçə yubileyin keçirilməsi
planlaşdırılır. Hüseyn Cavidin yubileyinin yekun
tədbiri olaraq, onun haqqında çəkilmiş "Cavid
ömrü" filminin premyerası keçiriləcək.
Bakıda və Azərbaycanın bəzi rayonlarında musiqi
festivallarının keçiriləcəyini
söyləyən Ə.Qarayev Moskvada Nazirliyin
təşkilatçılığı ilə dahi
sənətkar Bülbülün yubileyinin qeyd edildiyini
söyləyib: "Bu yaxınlarda Kolumbiyada keçirilmiş
turizm təşkilatları konfransından
qayıtmışıq. Azərbaycanı və
ölkəmizin turizm sahəsini orada çox yüksək
səviyyədə təmsil etdik. Biz nəzərdə
tutmuşuq ki, 2020-ci ilə qədər dünya turizm
bazarında ölkəmizin xüsusi çəkisi
formalaşsın və bunun üçün 2008-2017-ci
illəri əhatə edən proqramı
hazırlayırıq". Əbülfəs Qarayev
ölkəmiz üçün mühüm qərarların
qəbul edildiyi digər bir görüşün isə
Liviyanın paytaxtı Tripoli şəhərində baş
tutduğunu deyib: "Orada İslam ölkələrinin
mədəniyyət nazirlərinin 5-ci konfransında Bakı
islam mədəniyyətinin paytaxt şəhəri elan edildi.
2009-cu ildə həmin möhtəşəm konfransın
paytaxtımızda keçirilməsi qərara
alındı".
525-ci qəzet.- 2007.- 13 dekabr.- S. 7.