Namiq Əliyev: Azərbaycan dövləti dost Gürcüstandakı mədəni irsimizin bərpasına və qorunmasına yüksək səviyyədə qayğı göstərir

AzərTAc-ın xüsusi müxbiri Azərbaycan Respublikasının Gürcüstandakı səfiri Namiq Əliyevlə görüşüb ondan müsahibə almışdır. Diplomat ölkələrimiz arasında münasibətlər barədə fikirlərini bölüşmüşdür. Həmin müsahibəni təqdim edirik.
-Cənab səfir, ötən əsrin 90-cı illərində ulu öndər Heydər Əliyev yenidən hakimiyyətə qayıtdıqdan sonra Tbilisidə dahi mütəfəkkirlərimiz M.F.Axundovun, N.Nərimanovun və C.Məmmədquluzadənin ev-muzeylərinin açılması, bərpası istiqamətində işlərə başlandı. Azərbaycan Respublikasının Prezidenti kimi Gürcüstana ilk səfəri zamanı Heydər Əliyev gürcüstanlı soydaşlarımızla Tbilisidə görüşərkən onlara dedi ki, siz öz vətəninizdə, doğma torpağınızda yaşayırsınız. Bütün bunlar o zamankı ağır vəziyyət və kriminal şərait üzündən köç havasına köklənmiş borçalıları bu fikirdən daşındırdı. Azərbaycanın görkəmli ədiblərinin, ictimai-siyasi xadimlərinin ev-muzeylərinin açılmasından, tarixi abidələrin bərpa olunmasından xəbər tutan soydaşlarımızda yurd-yuvaya bağlılıq hissi daha da gücləndi. Gürcüstan azərbaycanlılarının bu qənaətinə siz nələri əlavə edərdiniz?
-Ümummilli liderimiz Heydər Əliyev ötən əsrin 90-cı illərinin əvvəllərində yenidən hakimiyyətə gələndən sonra ölkədaxili problemlərlə yanaşı, xaricdə yaşayan soydaşların, o cümlədən Gürcüstan azərbaycanlılarının problemləri, onların yoluna qoyulması məsələləri ilə də yaxından maraqlanmış, müvafiq strukturlardan bu istiqamətdə fəaliyyətlərini daha da genişləndirməyi tələb etmişdir. Gürcüstanlı azərbaycanlıların bu dövlətdə cəmiyyətə inteqrasiyası, onların dədə-baba yurdlarına möhkəm bağlanması, o illərin məlum hadisələri, sıxıntıları, milli mənsubiyyətə görə təzyiqlərin nəticəsində doğma torpaqları tərk etmək təhlükəsinin qarşısının alınması üçün təsirli tədbirlər görülməyə başlandı.
Ulu öndərin qəti tapşırıqları sayəsində bütün istiqamətlərdə işlər canlandı, qüvvələr səfərbərliyə alındı. Ötən əsrdə Gürcüstanda fəaliyyət göstərmiş azərbaycanlı mütəfəkkirlərin, ictimai-siyasi xadimlərin adlarının əbədiləşdirilməsi, onların qəbirüstü abidələrinin qaydaya salınması, ev-muzeylərinin açılması və s. məsələlər qaldırıldı.
Artıq soydaşlarımız dərk edirdilər ki, onların arxasında Azərbaycan durur, başda Prezident Heydər Əliyev olmaqla Azərbaycan Respublikasının rəhbərliyi onların problemləri ilə maraqlanır və ən başlıcası, bu torpaqda onlar müvəqqəti məskunlaşmayıblar, Borçalı onların öz vətəni, doğma yurdudur, burada onların əcdadları uyuyur, burada onlar tarix yaradıblar. Bütün bunları sahibsiz qoyub getməyi əcdadların ruhu bağışlamaz, gələcək nəsil bağışlamaz. Dünya şöhrətli dövlət xadimi Heydər Əliyevin hər sahədə olduğu kimi, bu sahədə də uzaqgörən siyasəti öz bəhrəsini verdi, köçün qarşısı alındı, Gürcüstanda azərbaycanlılara münasibət müsbət mənada dəyişdi.
-Namiq müəllim, siz Gürcüstanda yaşayıb-yaratmış azərbaycanlı mütəfəkkirlərin fəaliyyəti barədə söhbət açdınız. Onların adları bu ölkədə necə əbədiləşdirilib?
-Bir çox görkəmli ədib, yazıçı və siyasi xadimlərimizin taleyi Gürcüstanla, Tbilisi ilə bağlı olmuşdur. O dövrdə Tbilisi Cənubi Qafqazın mədəniyyət mərkəzi hesab olunurdu və görünür, ədiblərimizin öz taleyini bu şəhərlə bağlamasında həmin amilin böyük rolu olub. Hələ sovetlər zamanında Tbilisidə Mirzə Fətəli Axundovun ev-muzeyi açılmışdı. Sonralar muzey binası, burada yerləşdirilmiş eksponatlar bərbad hala düşmüşdü. Bununla əlaqədar Azərbaycan Prezidenti İlham Əliyevin göstərişi ilə müvafiq tədbirlər görüldü. Azərbaycanın Mədəniyyət və Turizm Nazirliyi yeni eksponatların əldə edilməsinə yardım göstərdi, muzey qaydaya salındı və normal fəaliyyətə başladı.
Sonra Nəriman Nərimanov və Cəlil Məmmədquluzadənin Gürcüstan paytaxtındakı ev-muzeylərinin yaradılması ilə bağlı işlərə başlandı. Onların ünvanı dəqiqləşdirildi və özəlləşdirilib ev-muzeylərə çevrilməsi istiqamətində tədbirlər görüldü. Yeri gəlmişkən, həmin binalar Azərbaycanın fiziki şəxsləri tərəfindən özəlləşdirilmişdi. Bu muzeylərin statusunu bərpa etmək üçün son iki ildə xeyli iş görülmüşdür. Nəticədə M.F.Axundovun ev-muzeyi ilə yanaşı, N.Nərimanov və C.Məmmədquluzadənin ev-muzeylərinin də Gürcüstan Mədəniyyət, Abidələrin Mühafizəsi və İdman Nazirliyinin dövlət reyestrinə salınmasına nail olduq. Beləliklə, nazirliyin dövlət reyestrinə 3 muzeyimizin adı düşdü. Sonra həmin muzeylərin binasının Şəmkir Rayon İcra Hakimiyyətinin sabiq başçısı Aslan Aslanovun mülkiyyətindən Azərbaycan Respublikası Mədəniyyət və Turizm Nazirliyinin adına keçirilməsi zərurəti yarandı. Bununla əlaqədar Aslan müəllimə müraciət olundu və o, buna məmnuniyyətlə razılıq verdi. Beləliklə, vətənpərvər ziyalı Aslan Aslanov həmin muzeylərin binalarını Azərbaycan dövlətinə bağışladı. Ona bu qərarına görə təşəkkür edirik. Hazırda həm N.Nərimanovun, həm də C.Məmmədquluzadənin ev-muzeyləri Mədəniyyət Nazirliyimizin balansındadır və onlar Azərbaycan dövlətinin mülkiyyətidir.
-Azərbaycanla Gürcüstan arasında münasibətlər uğurla inkişaf etdirilir. Əsrin layihələrinin məhz Gürcüstandan keçməklə gerçəkləşməsində ölçüyəgəlməz xidmətləri olmuş ümummilli lider Heydər Əliyevə minnətdarlıq əlaməti olaraq ulu öndərin Tbilisinin ən abad məhəlləsində büstü qoyulmuşdur.
-Bəli, Azərbaycan-Gürcüstan münasibətləri uğurla inkişaf etdirilir. Bunu Heydər Əliyev siyasi məktəbinin layiqli yetirməsi, Prezidentimiz İlham Əliyev dəfələrlə vurğulamışdır və dövlətimizin başçısının təbirincə desək, Azərbaycan-Gürcüstan münasibətinin çox gözəl, zəngin tarixi var. Gürcüstan Azərbaycan üçün çox əhəmiyyətli dost ölkədir, bizim strateji tərəfdaşımızdır. Bu günlərdə Azərbaycan, Türkiyə və Gürcüstan prezidentlərinin Bakı-Tbilisi-Qars dəmir yolunun çəkilişinə başlanmasını imzaları ilə təsdiqləməsi və gələcəkdə bölgənin rifahı naminə bir sıra layihələrin gerçəkləşməsində həmrəy olduqlarını nümayiş etdirməsi bu fikrin sübutudur. Bir zamanlar çoxlarının əfsanə saydığı bu nəhəng layihələrin gerçəkləşməsi Heydər Əliyev siyasi iradəsinin, cəsarətinin nəticəsidir. Buna görə də onun Tbilisidə büstünün qoyulması, adına küçə verilməsi gürcü xalqının bu dahi şəxsiyyətə minnətdarlığı kimi qiymətləndirilməlidir. Son zamanlar muzeylərlə yanaşı, Tbilisinin Nəbatat bağında dəfn olunmuş azərbaycanlı mütəfəkkirlərin qəbirlərinin üstü götürülmüş, büstləri qoyulmuşdur. Bu və digər mədəni tədbirlər Heydər Əliyev Fondunun prezidenti Mehriban xanım Əliyevanın səyləri və fondun təşəbbüsü ilə həyata keçirilmişdir. Bu istiqamətdə işlər gələcəkdə də davam etdiriləcəkdir.

Xalq qəzeti.- 2007.- 1 dekabr.- S. 3.