Misirin İsgəndəriyyə Kitabxanasının direktoru Bakı Dövlət Universitetində olmuşdur

Ölkəmizdə səfərdə olan Misir Ərəb Respublikası (MƏR) İsgəndəriyyə Kitabxanasının direktoru İsmayıl Serageldin dekabrın 26-da Bakı Dövlət Universitetində (BDU) olmuşdur.
Görüşdə BDU-nun rektoru, Milli Məclisin deputatı, akademik Abel Məhərrəmov İ.Serageldinin həyat və fəaliyyəti barədə geniş məlumat vermiş, onun MƏR-in ən böyük elm məbədlərindən sayılan İsgəndəriyyə Kitabxanasının formalaşmasında və inkişafında mühüm xidmətləri olduğunu bildirmişdir.
Rektor Bakı Dövlət Universitetində təhsilin inkişafı ilə bağlı həyata keçirilən tədbirlərdən bəhs edərək diqqətə çatdırmışdır ki, hazırda bu elm müəssisəsinin 16 fakültəsində 18 mindən artıq gənc təhsil alır.
BDU-da ərəb dili və ədəbiyyatı üzrə yüksək ixtisaslı mütəxəssislərin hazırlandığını qeyd edən akademik A.Məhərrəmov, eyni zamanda, müəyyən sayda azərbaycanlı tələbələrin Misir Ərəb Respublikasının tanınmış universitetlərində dil kursları keçdiklərini söyləmişdir.
Rektor ölkəmizin kitabxanaları ilə İsgəndəriyyə Kitabxanası arasında əlaqələrin genişlənəcəyinə əmin olduğunu bildirmişdir.
Görüşdən məmnun qaldığını qeyd edən İ.Serageldin xalqlarımızın dostluq münasibətlərinin əhəmiyyətini vurğulamışdır.
Rəhbərlik etdiyi İsgəndəriyyə Kitabxanasının tarixi və fəaliyyəti barədə ətraflı məlumat verən qonaq, həmin elm məbədinin yenidən qurulduğunu, müasir avadanlıqla təchiz edildiyini nəzərə çarpdırmışdır.
Sonra İsmayıl Serageldin universitetin tədris şəraiti ilə tanış olmuşdur.

Xalq qəzeti.- 2007.- 27 dekabr.- S. 8.