Windowsun Azərbaycan dilinə tərcüməsi başa çatır

Proqram üzrə 1 milyon söz tərcümə edilib

Azərbaycan dilində "Windows" sisteminin yaradılması ilə bağlı aparılan işlər yekunlaşmaq üzrədir. Bu barədə məlumatı jurnalistlərə açıqlamasında Prezidentin İcra Aparatının informasiya texnologiyalarının tətbiqi şöbəsinin müdiri Elmir Verdizadə verib. Onun sözlərinə görə, artıq proqramın "X" sisteminin hazırlanması prosesi başa çatdırılaraq istifadəçilərə təhvil verilib. Hazırda proqramın "Vista" əməliyyat sistemi Azərbaycan dilinə tərcümə olunur. Proqramın ofis paketinin də tərcüməsinə başlanıb. Bu istiqamətdə işlərin sürətlə getdiyini deyən Elmir Verdizadə bildirib ki, bu işlər artıq sona çatmaq üzrədir. Çünki bu prosesdə işin çox hissəsi görülüb. Prosesdə yerli şirkətlərlə yanaşı, məşhur "Microsoft" şirkəti də işləyir. Artıq işin razılaşdırılma mərhələsidir. Proqram üzrə 1 milyona yaxın sözün tərcüməsi həyata keçirilib.
   E.Verdizadə deyib ki, Azərbaycan dilinə tərcümə olunan kompyuter proqramlarının dövlət qurumlarında məcburi istifadə olunması nəzərdə tutulmayıb. Proqramın tətbiqində heç bir məhdudiyət nəzərdə tutulmayıb: "Bu prosesdə məhdudiyyət də qoyulmayıb. Kimə necə rahatdırsa, proqramlardan o cür də istifadə edə bilər. Proqramların tərcüməsində məqsəd kompyuterdən Azərbaycan dilli istifadəçilərə şərait yaratmaqdır. Bu prosesdə başqa istifadəçilərə heç bir məhdudiyyət qoyulmayıb".
Azərbaycanın internet provayderlərinə dünyaya çıxış üçün heç bir məhdudiyyət qoyulmayıb. Bu barədə də məlumatı Prezident Aparatının informasiya texnologiyalırının tətbiqi şöbəsinin müdiri Elmir Verdizadə verib. Onun sözlərinə görə, Azərbaycanın internet provayderləri hazırda bütün dünya provayderlərinə çıxış əldə edib və bu imkandan lazımi səviyyədə istifadə edir. Provayderlərin xaricə çıxışına heç kim məhdudiyyət qoya bilməz.
Azərbaycanla Ermənistan arasında müharibə şəraiti yaşanmasına baxmayaraq, ölkələr arasında informasiya müharibəsi getmir. Elmir Verdizadənin sözlərinə görə, bu barədə ictimaiyyətdə müxtəlif məlumatlar yayılsa da, belə bir fakta təsadüf edilməyib: "Yayılan məlumatlar uydurmadır. Belə bir müharibə yoxdur".
Azərbaycanda elektron hökumətin yaradılması ilə bağlı bir neçə istiqamətdə görülən işlər yekunlaşıb. Bunu da jurnalistlərə açıqlamasında Prezidentin İcra Aparatının informasiya texnologiyalarının tətbiqi şöbəsinin müdiri Elmir Verdizadə deyib. Onun sözlərinə görə, bu proses artıq bəzi qurumlarda tətbiq olunub və olunmaqdadır: "Artıq vergi bəyannamələrinin elektron variantda qəbul olunması tətbiq edilib. Bundan başqa Tələbə Qəbulu üzrə Dövlət Komitəsi artıq imtahan nəticələrini və digər elanları elektron variantda təqdim etməyə başlayıb. Bu proseslər hamısı elektron hökumət layihəsi üzrə həyata keçirilir". Elmir Verdizadə deyib ki, bu proses get-gedə genişlənir və elektron hökumət tam reallaşır.

Mövqe.- 2007.- 4-5 dekabr.- S. 7.