Bakı jurnalı Bakıdan bəhs edəcək

Şairləri, bəstəkarları, rəssamları misilsiz sənət əsərləri yaratmağa ruhlandıran doğma şəhərimiz indən belə həm də "Bakı" elitar jurnalının başlıca mövzusu olacaqdır. Jurnalın baş redaktoru Heydər Əliyev Fondunun Rusiya Federasiyasındakı nümayəndəliyinin rəhbəri, MDBMİ yanında Azərbaycan gəncləri klubunun prezidenti Leyla Əliyevadır.

Yurdumuzun şeirlərdə və nəğmələrdə, məşhur rəssamların əsərlərində vəsf olunan qədim paytaxtının müxtəlif guşələri - İçərişəhər, Bakının rəmzi sayılan Qız qalası, habelə Atəşgah və digər görməli yerləri jurnalın səhifələrində yeni rakursda təqdim ediləcəkdir. Bakı isə böyüyür, göydələnlərin sayı günbəgün artır. Çox keçməz ki, mavi Xəzərin sahilində, Nardaran həndəvərində müasir kurort zonası salınacaqdır.

Moskvalı biznesmen, "Krokus-siti"nin sahibi, soydaşımız Araz Ağalarov tarixi vətəninə daha çox turist cəlb etmək məqsədi ilə 500 min kvadrat-metrdən artıq sahəni əhatə edəcək bu ərazidə mehmanxanalar, əyləncə mərkəzləri, yaxt-klub və digər obyektlər tikdirmək fikrindədir.

Təqdimat mərasimi dekabrın 19-da keçiriləcək yeni jurnal da öz üzərinə belə bir missiya götürmüşdür. Ancaq bu, Odlar diyarının təbliği üçün atılan ilk addım deyildir. Bir müddət əvvəl xalqımızın zəngin mədəniyyətindən və tarixindən bəhs edən reklam çarxı çəkilmişdir və Moskva telekanallarından birində nümayiş etdiriləcəkdir.

Şübhəsiz, Leyla Əliyevanın "Bakı" jurnalı bu işin növbəti və yetərincə sanballı davamı olacaq və Xəzərin Azərbaycan sahillərinin dünyanın hər yerindən turistlərin sevimli istirahət guşəsinə çevrilməsinə kömək edəcəkdir.

Respublika.- 2007.- 16 dekabr.- S. 2.