Muğam Teatrında simpozium keçirilmişdir

Dekabrın 18-də Azərbaycan Dövlət Muğam Teatrında simpozium keçirilmişdir. Bu tədbir çərçivəsində İçərişəhər tarix-memarlıq muzey-qoruğu ərazisində arxeoloji qazıntılar zamanı aşkar edilmiş maddi mədəniyyət abidələrinin təqdimatı olmuşdur. Sərgidə məişət əşyaları nümayiş etdirilirdi.

Muzey-qoruğun direktoru Kamran İmanov qeyd etdi ki, budəfəki simpozium indiyə qədər aparılmış işlərin nəticəsidir. Qədim Azərbaycanın sərgidə nümayiş etdirilən maddi mədəniyyət abidələri bu işin səmərəsini əyani təsdiq edir. Simpoziumda ölkənin qanunverici orqanının nümayəndələrinin - Milli Məclisin deputatları Nizami Cəfərov, Ziyad Səmədzadə, Rəbiyyət Aslanova, Azərbaycan Milli Elmlər Akademiyasının prezidenti Mahmud Kərimov, elmi tədqiqat institutlarının direktorları, Yunanıstan, Moldova, Kuba səfirliklərinin nümayəndələri və başqa şəxslərin iştirak etməsi faktı da bu hadisənin əhəmiyyətinə və elm aləmində Azərbaycan tarixinə marağın heç də ötəri olmadığına dəlalət edir.

K.İmanovun dediyinə görə bu işlər davam etdiriləcəkdir. Muzey-qoruğun direktoru demişdir: "Bu işdə ölkəmizin birinci xanımı Mehriban Əliyeva bizə çox kömək edir".

Qeyd edək ki, sözügedən abidələrin çox hissəsi Neftçilər prospektində uçurulmuş evin yerində aşkar edilmişdir.

Respublika.- 2007.- 19 dekabr.- S. 4.