Azərbaycanlı rəssamın terrorizmi lənətləyən əsəri Nyu-York muzeyinə verilmişdir

AzərTAc xəbər verir ki, Azərbaycanın əməkdar rəssamı, YUNESKO Rəssamlar Federasiyasının, Rusiya Rəssamlar İttifaqının və Almaniya Rəssamlar Birliyinin üzvü, "Dünya xalqlarının incəsənəti" Beynəlxalq Assosiasiyası mükafatının laureatı Əşrəf Heybətovun əsərlərindən biri Nyu-York muzeyinə verilmişdir.
Xatırladaq ki, Azərbaycan Prezidenti
İlham Əliyevin Almaniyaya rəsmi səfəri zamanı görüşdüyü soydaşlarımız arasında Əşrəf Heybətov da vardı. O, 10 ildən çoxdur bu ölkədə yaşayır, vətənindən isə taleyin hökmü ilə təxminən 25 il əvvəl çıxmışdır. Buna baxmayaraq, dostlarının və həmkarlarının dedikləri kimi, Əşrəf Heybətov doğma diyarı görmək, havası ilə nəfəs almaq üçün, az qala, hər il Azərbaycana, sevimli Bakısına gəlir.
Fırça ustasının vətənə növbəti gəlişlərindən birində "Abşeron" rəsm qalereyası müdiriyyətinin təşəbbüsü ilə burada onun əsərlərinin sərgisi təşkil edilmişdi. Yadımdadır, sərgi "Salam, Yeni Azərbaycan!" adlı iri tablo ilə açılmışdı. Rəssam doğma torpaqla, azadlığa, müstəqilliyə qovuşan Vətəninin yeni həyatı ilə görüşdən aldığı bütün sevincini, duyduğu qüruru sanki bu əsərə köçürmüşdü. Bu, nikbinliklə dolu ballada -Vətənə himn idi.
Əşrəf Heybətov həm realist, həm də romantikdir. Onun rəngkarlıq əsərləri də, dəqiq ifadəli qrafikası da təsviri sənət sərraflarının diqqətini eyni dərəcədə cəlb edir. Bəşəriyyətin taleyinə, Yer üzündə sülhün və əmin-amanlığın qorunub saxlanmasına biganə qalmayan bir insan kimi, o, "Nyu-York, 11 sentyabr" adlı əsərində terrorizmi hiddətlə lənətləmişdir. Uzun müddət Moskvada yaşayıb-yaradan soydaşımızın məhz bu əsərini Rusiyanın Bonndakı baş konsulu Nyu-York sakinlərinə hədiyyə etmişdir. Bununla əlaqədar keçirilən mərasimdə ABŞ-ın Bonndakı baş konsulu bildirmişdi ki, Əşrəf Heybətovun bu əsəri Nyu-York muzeyinə veriləcəkdir.
Həmvətənimiz axırıncı əsərlərindən birini "Terrordan planetar etikaya. Dünya dinləri" mövzusunda Moskvada keçirilmiş beynəlxalq forumla əlaqədar yaratmışdır.
Öz tarixi Vətənini ürəkdən sevən Əşrəf Heybətov terrorizmin bəşəriyyəti hansı müsibətlərə düçar etdiyini yaxşı bilir və buna görə də öz zəngin yaradıcılığı ilə bu dəhşətli bəlaya qarşı dərin nifrət və etirazını bildirir.

Azərbaycan.-2007.-22 fevral.-S.3.