Kamioloğlu V.

Rasim Balayev: Xətai rolunu oynamaq arzusundayam

Rasim müəllim, hazırda rejissorluq edən aktyorlar da az deyil. Buna münasibətiniz necədir?.

- Ümumilikdə bunu müsbət qarşılayıram. Bilirsiz, mən indiyə qədər 70-ə yaxın filmə çəkilmişəm. Bu gün mənə kino çəkmək təklifi gəlsə, düşünmədən imtina edərəm . Ona görə ki, bu tamam başqa bir sənətdir. Həmin işi görən insanın gərək ilk növbədə bu sənət üzrə təhsili, sonra isə xüsusi istedadı olsun. Hansı rollara çəkilmək arzusu ilə yaşayırsınız?

- Arzuladığım rolları oynamaq mənim istəyimdən asılı deyil. Xətaini oynamaq istəyirəm, bu artıq arzusunda olduğum bir roldur. Amma Xətai barədə film çəkmək üçün külli miqdarda vəsait tələb olunur. Xoşbəxtlikdən Nəsimini, Babəki, bir müddət bundan öncə isə Hüseyn Cavid obrazını yaratmaq mənə nəsib olub.

- "Otel otağı"," Həm ziyarət, həm ticarət", "Küçələrə su səpmişəm" kimi filmlərdə siz mənfi obrazlar yaratmısınız. Necə düşünürsünüz, Nəsimidən, Babəkdən sonra mənfi xarakterli rollar yaratmaq tamaşaçılarda çaşqınlıq əmələ gətirmir ki?

- Adlarını sadaladığınız filmlərdə mənfi obraz yaratmağa çalışmışam. Təbii ki, rola qiyməti tamaşaçı verir. Mən bu obrazları öz təxəyyülümdə yaratmağa nail olmuşam. Ümumiyyətlə, eyni tipli deyil, dəyişik obrazlar yaratmaq istəmişəm. Çünki təkrar olunmağı sevmirəm. Amma tamaşaçılar məni müsbət obrazda görməyə alışıblar.

İki sahil.- 2007.- 14 fevral.- S. 8.