Mövsümova S.

“Animasiya filmlərimizlə xarici bazarlara çıxmaq olar”

Gənc animatorlar yetişdirmdk üçün iki mərhələli xüsusi layihə hazırlanıb

Azərbaycanda animasiya filmlərinin istehsalı ilə təkcə "Azanfilm" studiyası məşğul olur. Bu studiya dövlət hesabına ildə cəmi 1 qısametrajlı film istehsal edə bilir. Amma, deyəsən, yaxın zamanlarda bu problemin həlli gözlənilir. "Azanfilm" studiyasının rəhbəri Elçin Hami Axundovun dedikləri belə düşünməyə əsas verir. Elçin Hami Axundov hesab edir ki, Azərbaycanda istehsal edilən animasiya filmlərilə xarici bazarlara çıxmaq olar. Onun sözlərinə görə, milli kinomuz ancaq animasiya və sənədli filmlərlə bazara çıxa bilər: "Səviyyəli bədii film çəkmək üçün ən azı 5-6 milyon dollar lazımdır. Tammetrajlı animasiya filmi üçünsə 500-700 min dollar kifayət edər. Hazırlıq üçün ilyarım-iki il zaman gərəkdir. Hər rəssam animator kimi işləyə bilməz. Dünyada animatorlar yetişdirən xüsusi məktəblər yoxdur. İndiki animatorlarımız “Soyuzmultfilm”də, Kiyev və Tiflis studiyalarında kursları bitirənlərdir. "Soyuzmultfilm"də 4 ildən bir ikiillik kurs təşkil olunurdu. Əgər 20 nəfər qəbul olunurdusa, sonda onlardan ancaq 1 -2 nəfər animator kimi studiyada fəaliyyətini davam etdirirdi. Animatorluq unikal rəssam sənətidir". Məlum faktdır ki, animatorlarımız müəyyən dövrlərdə işsizlik ucbatından başqa ölkələrə üz tutdular. Məsələn, Elçin müəllimin agah etdiyim kimi bir animatorumuz "Disney" studiyasında işləyir. İki animatorumuz isə, İsraildə özlərinə studiya açıb. Əksəriyyəti Litvada, Polşada, Almaniyada, Türkiyədə, Rusiyada ya öz studiyalarını yaradıblar, ya da başqa studiyalarda çalışırlar. Elçin müəllim rəssamların da işinə sözarası ehyam vurdu: "Rəssam var şəkil çəkə bilir, amma aktyorluğu yoxdur. Onlan uzaqbaşı cizgiçi kimi işlətmək olar. Animator rəssam gərək həm də aktyor olsun. "Disney" belə animatorları göydə qapır".

E. Axundov gənc animatorlar yetişdirmək istəyir və bununçün iki mərhələli xüsusi layihə də işləyib. Birinci mərhələ ilyarım ərzində 40 nəfər gənc rəssamdan animator hazırlamağı nəzərdə tutur. İkinci mərhələdə həmin gənclər 70-80 dəqiqəlik, yəni tammetrajlı animasiya filmlər çəkməlidilər.ilyarım kurslar yerli mütəxəssislərə həvalə ediləcək ki, onlar sıraşına ixtiyar animatorumuz Elçin Hami Axundov, Rauf Dadaşov, Firəngiz Quliyevanın adları daxildir. Kurslara 50-60 min manat maliyyə sərf olunacaq. İlk 40 nəfər üçün seçim olacaq. E. Axundovun sözlərinə görə, əgər həmin 40 nəfərdən 10 nəfər animator ixtisaslaşsa, bu çox sevindirici hal olar. O mütləq ya "Soyuzmultfilm"dən, ya da Kiyev studiyasından mütəxəssislərin gətirilməsini də vacib hesab edir: "Hər iki aydan bir onların bir həftəlik ustad dərsləri təşkil olunacaq. İlyarım ərzində animatorlar hazırlanması ilə paralel ssenarilər də yazılacaq. Kursları keçənlərin hər biri diplom işi kimi 3 dəqiqəlik animasiya filmi çəkəcəklər. Bu isə 40 animasiya filmi deməkdir". Elçin müəllim adıçəkilən layihənin 2006-2016-cı il Mədəniyyətin inkişafı Konsepsiyasının tərkib hissəsi olmasını istəyir. "Layihəni təqdim edəndə Mədəniyyət və Turizm Naziri Əbülfəs Qarayev çoxdan belə bir layihə gözlədiklərini dedi. Əslində layihə çoxdan hazır idi, sadəcə nazirlikdəki struktur dəyişiklikləri dövrünə düşdü və onu təqdim etməkdə gecikdik".

Onu da deyək ki,E. Axundov keçən il Zahid Xəlilin ssenarisi əsasında "Ayna" adlı fiimini çəkib. Film 3-5 yaşlı uşaqlar üçün 11 dəqiqəlik filmdir. "Mövzulara gəldikdə, əlbəttə, onlar dəyişiləcək. Azərbaycanda dünya üçün maraqlı ola biləcək mövzular, bundan əlavə nağıllar, rəvayətlər və dini mövzular da var. 2007-ci ildə animasiya filmi çəkmək üçün "Nağıl nobatı" və "Dost arası düz gərək" adlı layihələr təqdim olunub ki, onlar arasında da seçim aparılıb biri qəbul olunacaq".

Paritet.- 2007.- 17-19 fevral.- S. 11.