Rüstəm Z.

Film çəkmək üçün şərait olmalıdır

Artıq bir neçə aydır Türkiyənin TRT kanalı vasitəsi ilə "Dədə Qorqud" serialı yayımlanır. Türk kinematoqrafçılarının ərsəyə gətirdikləri filmdə baş rolu Xalq artisti Fuad Poladov oynayıb. Filmə dəvəti barədə danışan aktyor türk rejissoru ilə tanışlığından söz saldı. Dedi ki, "Dədə Qorqud"da baş rola dəvət almağının səbəbi "Fatehlərin divanı" filmində çəkilərkən, türk rejissorları tərəfindən bəyənilməsi və ondan sonra həmin fılmə dəvət alması olub: "Çəkilişlər uğurla keçir. Qeyd edim ki, "Dədə Qorqud" filminin iki rejissoru var. İlk dörd seriyam Atilla Cander, qalan bölmələri isə Çin Erker çəkib. Artıq fılmin 6 bölümü yayımlanıb. Qalan hissələrin çəkilişləri isə davam edir". Xalq artisti türk rejissoru ilə işləməyin bir o qədər çətin olmadığını dedi. O, Azərbaycanlı rejissorlarla qonşu dövlətin kinematoqrafçıları arasında elə böyük fərqin olmadığını dedi. "Vacib olan budur ki, film çəkmək və filmə çəkilmək üçün şərait olsun", - deyə Fuad Poladov söylədi ki, filmdəki bütün epizodlar Türkiyədə lentə alınıb. F.Poladov yaradıcılığının digər mərhələsindən söz açaraq dedi ki, hazırda "İbrus" Teatrında Rüstəm İbrahimbəyovun "Buninin son döyüşü" tamaşası üzərində məşqlər edir: "Tamaşanı çox maraqlı mövzu əhatə edir. Bir türk Fransaya səfər edir və orada başına qeyri-adi hadisələr gəlir. Həmin macəraları izləmək istəyirsinizsə, tamaşanın may ayında keçiriləcək premyerasına gəlin. Təqdimat mərasimindən sonra yaradıcı qrupla həmin tamaşanı bir neçə ölkənin teatrlarının səhnəsində nümayiş etdirmək nəzərdə tutulub".

Ayna.- 2007.- 21 fevral.- S.8.