Musiqi Mədəniyyət Muzeyi yeni not əlyazmaları əldə edib

Bu əsərlərin bəzilərinin 80 yaşı var

Azərbaycan Musiqi Mədəniyyəti Dövlət Muzeyinin not əlyazmaları kolleksiyası zənginləşdirilib. Belə ki, bu günlərdə muzey rəhbərliyi Dövlət Rus Dram Teatrından maraqlı materiallar əldə edib. Bunlar uzun illər ərzində teatrın repertuarında yer alan tamaşalara tanınmış bəstəkarlar tərəfindən yazılan musiqilərin not əlyazmalarıdır. Əldə olunmuş yeni kolleksiyalar arasında Ü.Hacıbəyov, Q.Qarayev, S.Hacıbəyov, F.Əmirov, T.Quliyev, A.Əlizadə, X.Mirzəzadə və L.Laynşteynə məxsus əlyazmaların həm orijinalı, həm də surətləri var.

Muzeyin direktoru Alla Bayramovanın sözlərinə görə, bu əsərlər indiyədək Rus Dram Teatrının kitabxanasında saxlanılıb: «Teatrda aparılan təmir işləri ilə əlaqədar kollektiv müvəqqəti başqa yerə köçməli olub. Əlyazmaları isə bizə hədiyyə veriblər».

Qeyd edək ki, daxil olmuş nadir əlyazmaların 15-80 il yaşı var. Məsələn, Üzeyir Hacıbəyovun «Ləzgi» rəqsinin notları 1932-ci il, Fikrət Əmirovun not yazılarından biri isə 1950-ci ilə aiddir. Onu da nəzərinizə çatdıraq ki, müəllif əlyazmalarından bəziləri nəşr olunmayıb. Alla xanım dedi ki, bu əlyazmaların tezliklə yayılması və təbliğ olunması üzərində iş gedir: «Biz onları sistemləşdirəcək və bərpa edəcəyik. Yeni əldə etdiyimiz not əlyazmalarının səsləndirilməsiylə bağlı Bakı Musiqi Akademiyasının dosenti Ülviyyə Hacıbəyovaya müraciət etmişik. Ondan xahiş etmişik ki, bu əsərləri ifa eləsin».

Yeri gəlmişkən, Musiqi Mədəniyyəti Dövlət Muzeyinin 40 illik yubileyi də yaxınlaşır. Bununla bağlı muzey rəhbərliyi silsilə tədbirlərin keçirilməsini planlaşdırır. Onların arasında yeni veb-saytın təqdimatı, bəstəkar musiqilərindən ibarət disk və muzeyin tarixini əks etdirən kitabın nəşri də nəzərdə tutulub.

Gündəlik Azərbaycan.-2007.-14 fevral.-S.14.