Salmanov R.

Çətin yolun uğurlu başlanğıcı

Heydər Əliyev Fondunun prezidenti, YUNESKO-nun xoşməramlı səfiri, millət vəkili Mehriban Əliyevanın təşəbbüsü ilə"Space" telekanalında təşkil olunmuş televiziya muğam müsabiqəsinə ötən il yekun vurulsa da, ondan alınan xoş təəssürat müsabiqəni həvəslə izləmiş muğamsevər tamaşaçıların xatirindən hələ də silinməmişdir. Bu müsabiqənin dəyəri təkcə gənc istedadların üzə çıxarılması ilə bitmədi, eləcə də ulu muğam sənətimizin ölməzliyinə, ifaları ilə ürəkləri riqqətə gətirən, dünyasını dəyişmiş neçə-neçə ustad xanəndə və ifaçıların, qəzəlxan şairlərimizin ruhunu şad etdi.

Bu müsabiqə ölkəmizin müxtəlif bölgələrindən 500-ə yaxın gənc xanəndəyə öz bacarığını nümayiş etdirmək imkanı verdi. Respublikanın ən tanınmış, ustad xanəndə və ifaçılarının münsiflər heyətinin tərkibinə daxil olması rnüsabiqənin obyektiv keçəcəyinə xalqda tam əminlik yaratdı. Məhz bu obyektivliyin nəticəsi idi ki, öz məlahətli səsi, ifaçılıq məharəti ilə seçilən 20 gənc xanəndə müsabiqənin final mərhələsində iştirak etmək hüququ qazandı. Ritmik muğamlar, xalq mahnıları, M.Füzuli, S.Ə.Şirvani, Ə.Vahid, H.Qəni qəzəliyyatına həsr olunmuş muğam həftələri geniş tamaşaçı auditoriyasında bu müsabiqəyə sonsuz maraq oyatdı, günü-gündən geniş vüsət alan müsabiqə sənətə yenicə qədəm qoyan gənc ifaçılara populyarlıq, şöhrət qazandırdı. Vəfa Orucovanın, Babək Niftəliyevin, Təyyar Bayramovun, Elnur Zeynalovun, Elşad Aydınoğlu və digər müsabiqə iştirakçılarının adlarını artıq xalq əzbər bilir. Onların vaxtaşırı "Space" telekanalında yayımlanan çıxışlarını bu gün də tamaşaçılar maraqla izləyir.

YUNESKO-nun xoşməramlı səfiri, millət vəkili Mehriban xanım Əliyevanın bilavasitə dəstəyi və təşəbbüsü ilə muğam mərkəzinin inşa olunması, "Qarabağ xanəndələri" albomunun işıq üzü görməsi, gənc istedadlara, qocaman incəsənət xadimlərinə göstərilən diqqət və qayğı, eləcə də muğam müsabiqəsinin keçirilməsi təkcə muğam sənətimizin təbliği deyil, özümüzə, kökümüzə qayıdışın bir təcəssümüdür.

Münsiflər heyətinin, eləcə də tamaşaçıların yekdil qərarı ilə Təyyar Bayramov müsabiqənin qalibi oldu. Gənc xanəndənin həyatında rnühüm rol oynayan bu müsabiqə gələcək uğurların təməl daşıdır. Onluğa daxil olan qaliblərin ölkəmizin ayrı-ayrı bölgələrində verdikləri konsertləri xalq rəğbətlə qarşıladı. Konsertlərdə qazanılan tamaşaçı alqışları, saysız-hesabsız tər çiçək dəstələri doğma musiqimizə, gənc ifaçılara verilən ən yüksək qiymət idi. Şübhəsiz ki, bu sevincdə gənc xanəndələri ərsəyə gətirən, gecəni gündüzünə qatıb yorulmaq bilmədən onlara dərs deyən sevimli müəllimləri, ustad xanəndələr, xalq artistləri Canəli Əkbərov, Arif Babayev, Ağaxan Abdullayev, Səkinə İsmayılova, Mənsum İbrahimov və digərlərinin də payı var. Müsabiqə iştirakçılarının çoxu musiqi məktəbi, lisey və akademiyanın tələbələri olsalar da, bu müsabiqə gənc xanəndələrin peşəkar yaradıcılıq yollarına bir işıq saldı. Respublikanın müxtəlif tanınmış musiqi kollektivlərinə dəvət alanlar da az olmadı. Belə ifaçılardan biri də Muğam müsabiqəsinin qalibi, səsi, səhnə mədəniyyəti, eləcə də ifaçılıq məharəti ilə seçilən, artıq Opera və Balet Teatrının solisti olan, Milli Musiqi Akademiyasının tələbəsi, gənc xanəndə Təyyar Bayramovdur.

1970-ci ildə Ağdam şəhərində dünyaya göz açmış Təyyar Bayramov hələ uşaq ikən musiqiyə həvəs göstərirdi. Atası ixtisasca mühasib olsa da, musiqiyə, xüsusən də muğam sənətinə rəğbətli bir insan idi. Odur ki, oğlunu tar sinfinə qoyur. Məlahətli, ürək oxşayan səsilə hamının diqqətini özünə cəlb edən Təyyar bir müddət sonra məktəb rəhbərliyinin, valideynləri təkidilə rayon bədii özfəaliyyət kollektivində bir müğənni kinıi fəaliyyət göstərməyə başlayır. Xalq mahnıları, təsnif və muğam ifaçılığında ad çıxarır. Rayonun əksər rnədəni tədbirlərində, muğam müsabiqələrində uğurla çıxış edir.

Bir az keçmiş Qarabağ hadisələri ilə bağlı olaraq minlərlə ağdamlı kimi Təyyar Bayramovun ailəsi də Bakıya köçməli olur. Öz doğma yurd-yuvasından didərgin düşmüş minlərlə soydaşları kimi Təyyar Bayramov da el-oba xiffətini çəkir. Elə bu səbəbdən də doğma yurd həsrətilə keçən uşaqlıq, gənclik həyatının ağrı-acısını mahnıya çevirib onu yaşatmağa, soydaşlarının könlünü almağa çalışır. Repertuarında şən, lirik mahnılardan daha çox muğam, xalq mahnılarına üstünlük verir. Respublikada keçirilən gənc ifaçıların muğam müsabiqələrində uğurla çıxış edir. Elə bu müsabiqələrin birində də respubilkanın xalq artisti Mənsum İbrahimov gənc xanəndəni görür. Oxuduğu "Qarabağ şikəstəsi"ni, "Zabul segah"ı, təsnif və xalq mahnılarını bəyənir. M.İbrahimovun təkidi ilə Təyyar Bayramov Asəf Zeynallı adına musiqi məktəbinə daxil olur. Müəlliminin hər bir göstərişini, tövsiyəsini layiqincə yerinə yetirməyə can atan Təyyar Bayramov öz üzərində yorulmadan çalışır. Bu gün Təyyar Bayramov artıq Opera və Balet Teatrının solistidir. Sınaq müddətindo "Leyli və Məcnun" operasında yaratdığı İbn Solam obrazı teatrın baş rejissoru Hafiz Quliyevin, eləcə də tamaşada tərəf-müqabili olmuş, Məcnun rolunun ifaçısı, sevimli müəllimi, xalq artisti Mənsum İbrahimovun ürəyincə olur. Çox çəkmir ki, teatrın baş rejissoru Hafiz Quliyev daha mükəmməl bir partiyanı - M.Maqomayevin "Şah" İsmayıl" operasında Şah İsmayıl rolunu gənc xanəndəyə həvalə edir. Dekabrın 27-də tamaşanın premyerası oldu. Respublikanın xalq artisti Əlövsət Sadıqovun anadan olmasının 100 illiyinə həsr olunmuş bu tamaşada baş rolda çıxış etmək gəncin ən böyük arzusu olsa da, onun məsuliyyətinin də böyük olduğunu yaxşı dərk edirdi. Vaxtilə bu rolda çıxış etmiş Hüseynağa Hacıbababəyov, Əlövsət Sadıqov, Arif Babayev, Canəli Əkbərov, Baba Mahmudoğlu, Rafiq Əliyev kimi ustad ifaçılardan sonra bu rolda özünü təsdiq etmək çox çətin və şərəfli idi. Havanın yağmurlu və şaxtalı olmasına baxmayaraq, həmin gün salon tamaşaçı ilə dolmuşdu. Tamaşaya baxan Azərbaycan Bəstəkarlar İttifaqının katibi, musiqişünas, professor Ramiz Zöhrabov Təyyarın yaradıcılıq imkanlarına yaxından bələd olan bir musiqiçi kimi gəncin ilk tamaşada yaratdığı Şah İsmayıl obrazına çox yüksək qiymət verir.

Respublikanın xalq artisti Mənsum İbrahimov:

- Sevinirəm ki, artıq Opera və Balet Teatrı yeni bir Şah İsmayıl, opera səhnəsi yeni bir solist, Azərbaycan muğam ifaçılığı gözəl bir bir xanəndə qazandı. Yaratdığı obrazla o artıq öz sözünü dedi. Təyyarın müəllimi kimi çox sevinirəm ki, çəkdiyim zəhmət hədər getmədi. Təyyar çox zəhmətkeş, çalışqan oğlandır. Artıq o, mənim sənət yoldaşımdır. Ümid edirəm ki, Təyyar Bayramov opera səhnəsində Məcnunu, Kərəmi, Aşıq Qəribi də uğurla oynayacaqdır.

Biz də inanırıq ki, muğam ifaçılığı yolunda ilk uğurlu addımlarını atmış Təyyar Bayramovun istedad və zəhməti onu bu sənətin ən uca zirvələrinə qaldıracaqdır.

Xalq qəzeti.- 2007.- 11 fevral.- S. 8.