Muğamı gözdən
salmağa çalışanlar milli varlığımıza
qəsd edirlər
Nüfuzlu sənət adamları
və ziyalılar jurnalistləri milli-mədəni irsə
münasibətdə daha diqqətli və təəssübkeş
olmağa çağırdılar
Ötən gün
Beynəlxalq Mətbuat
Mərkəzində muğam
sənətinə ictimaiyyətin
və mətbuatın
klassik musiqi irsimizə münasibətilə
bağlı tədbir
keçirilib. Musiqişünas
Səadət Təhmirazqızı
muğamın Azərbaycan
xalqının misilsiz
mədəni sərvəti
olduğunu önə
çəkərək, bu
sənət vasitəsilə
ölkəmizin və
xalqımızın dünyada
daha geniş tanındığını bildirib.
Azərbaycanda son vaxtlar muğama yüksək səviyyədə böyük
qayğı göstərildiyini
deyən musiqişünas
bu sahədə Heydər Əliyev Fondunun prezidenti, YUNESKO-nun xoşməramlı
səfiri Mehriban Əliyevanın rolunun müstəsna əhəmiyyət
daşıdığını qeyd edib. S.Təhmirazqızı muğama
qarşı biganə
münasibətin, bəzi
hallarda cəmiyyət
arasında və xüsusən də mətbuatda bu müqəddəs sənətin
ünvanına arzuolunmaz
ifadələr işlədilməsinin
yolverilməzliyini vurğulayıb.
Milli Mədəniyyətin
Təbliği Mərkəzinin
sədri Arif Mədətov hər bir azərbaycanlının
muğamın təəssübünü
çəkməli, muğama
yönələn hücumların
qarşısını tərəddüdsüz
almalı olduğunu diqqətə çatdırıb:
"Bu yaxınlarda rast gəldiyim bir yazıda təkcə muğamın
yox, layla, bayatı janrında olan milli ədəbiyyat
nümunələrimizin də
ünvanına xoşagəlməz
sözlərə yer verilmişdi. Biz milli- mədəni sərvətlərimizi düşmənlərdən
qorumağa çalışırıq.
İndiki halda öz xalqımızın
nümayəndəsinin belə
fikirləri mətbuat
səhifəsinə çıxarması
mədəniyyətimizə böyük zərbədir.
Biz həmin yazını yazıb qəzetə verən şəxsin kimliyini müəyyənləşdirəcək və onunla bağlı məhkəməyə
müraciət edəcəyik".
Xalq artisti Habil Əliyev media nümayəndələrini
məsuliyyətli davranmağa,
mədəniyyət nümunələrimizin
keşiyində durmağa
çağırıb: "Bu cür fikirlər
təkcə muğama
deyil, bizim dinimizə, dilimizə, adət-ənənələrimizə
qarşı təhqirdir".
Xalq artisti Ramiz Quliyev muğamı
gözdən salmağa
çalışanların millətin mənəvi varlığına qəsd
etdiklərini dilə gətirib. R.Quliyev sözügedən yazı
ilə tanış olduğunu, orada muğam sənətinə
düşmən mövqedən
yanaşıldığını və bununla əlaqədar ciddi ölçü götürülməsinin
zəruriliyini qeyd edib. Tədbirdə çıxış edən
digər sənətkarlar
və ziyalılar da ictimaiyyət nümayəndələrini, media
təmsilçilərini muğamın
müqəddəsliyini qorumağa
çağırıblar.
525-ci qəzet.- 2007.- 16 fevral.- S. 7.