Sirkdə milli kollektiv yaranıb

Sirkin mətbuat xidmətinin rəhbəri Hümbətov Mahirin qəzetimizə verdiyi məlumata görə, Bakı Dövlət Sirkində maraqlı yenilik gözlənilir.

"SSRİ dövründə respublikalar ərazisində yerləşən bütün sirklər Ümumittifaq Sirk Birliyinə tabe idi. Sirklərin qastrol səfərləri bu birlik tərəfindən tənzimlənirdi. Onu da deyim ki, dünyada ən çox sirk kollektivi olan ölkə Rusiyadır, orada 80-ə yaxın sirk var. Onların 37-si stasionardır. Buna görə də əvvəllər sirk kollektivlərinin müxtəlif sirklərdə çıxış etməsi, yəni qastrolları problem yaratmırdı.

Lakin sirkimizin kollektivi keçid dövründə dağıldığından, o yalnız qastrolların hesabına fəaliyyət göstərirdi. Bir neçə il öncə sirkin direktoru Vaqif Bağırzadə təyin olunandan sonra o, azərbaycanlılardan ibarət milli kollektivin bərpa olunması təşəbbüsünü qaldırdı və bu istiqamətdə iş aparıldı. Milli kollektivin proqram şəkildə yığılması artıq başa çatıb. Allah qoysa mart ayında onun ilk çıxışı nəzərdə tutulub. Möhtəşəm bir proqram olacaq. Artıq nömrələr də müəyyənləşib. Kollektivə dəvət etdiklərimizin əksəriyyəti tanınmış artistlərdir. Onların bir qismi Rusiyanın əməkdar artistləri və müxtəlif beynəlxalq festivalların laureatlarıdır.

Azərbaycanda ümumiyyətlə, yaxın Şərqdə yeganə stasionar sirk müəssisəsi Bakı Dövlət Sirkidir. Qastrollara getməyən kollektiv istər-istəməz işini dondurmaq məcburiyyətindədir.

Sirkin belə bir spesifik xüsusiyyəti var. O, teatr kimi qısa bir müddətdə yeni proqram hazırlaya bilmir və bir proqramla uzun müddət çıxış edir. Buna görə də qastrola getmək üçün sabit bazar olmalıdır. Öz tamaşaçıları qarşısında eyni proqramla nə qədər çıxış etmək olar? Rusiya üçün maraqlı deyildi ki, başqa bir kollektiv gəlib onun bazarına girsin. Lakin artıq bu istiqamətdə də uğurlu danışıqlar aparılıb. Bakı Dövlət Sirkinin həm Rusiya Dövlət Sirk Kompaniyası, həm özəl sirklərlə məsələn, Nikulin və Böyük Moskva sirkləri, Belarusiya, Ukrayna və Gürcüstanın Dövlət Sirkləri ilə yaxın işgüzar əlaqələri yaranıb və ilkin razılaşmalar əldə olunub. İnşallah, Bakı Dövlət Sirkinin bu sirklərdə çıxışı təşkil olunacaq.

Bunu də qeyd edim ki, yayda başlanacaq təmir işlərindən sonra sirkin nəzdində milli kadrların yetişdirilməsi üçün sirk studiyası yaradılacaq".

İmpuls.- 2007.- 2-8 fevral.- S. 15.