Bayramov O.

Xalq yazıçısı Elçinin Qatil pyesinin İstanbulda tamaşası böyük müvəffəqiyyət qazanmışdır

Fevralın 12-də İstanbul Böyükşəhər Bələdiyyəsi Teatrının səhnəsində görkəmli Azərbaycan yazıçısı Elçinin "Ulduzlar altında cinayət" - "Qatil" pyesinin tamaşası böyük müvəffəqiyyətlə keçmişdir.
Tamaşadan əvvəl xalq yazıçısı Elçin Türkiyənin nüfuzlu televiziya kanalları və qəzetlərinə müsahibələr vermişdir. "Anadolu" xəbər agentliyi, "Milliyyət", "Zaman" qəzetləri, TRT, "Kanal 7" televiziya kanalları müxbirlərinin suallarını cavablandıran yazıçı-alim xalqımızın zəngin mədəni irsindən, klassik və çağdaş Azərbaycan ədəbiyyatından, qardaş və dost Türkiyə ilə mədəniyyət sahəsində əməkdaşlıqdan ətraflı bəhs etmişdir.
Anşlaqla keçən tamaşa teatrsevərlərin böyük marağına səbəb olmuşdur. Bir tərəfdən torpaqlarımıza düşmən təcavüzü ilə başlanan müharibənin, digər tərəfdən bir ictimai-siyasi quruluşdan digərinə keçidin yaratdığı kataklizmlər və təbəddülatların insan taleyində buraxdığı izlərin dərin sosial-psixoloji təhlili ilə tamaşaçını düşündürən, həmçinin bütün zamanlar üçün aktual olan məhəbbət, tale oyunları və puça çıxan ümidlər mövzusunu ustalıqla canlandıran əsərə Türkiyədə fəaliyyət göstərən aktrisa Məlahət Abbasovanın verdiyi orijinal quruluş teatrsevərləri heyran etmişdir.
Bütün ömrünü şagirdlərinin təlim-tərbiyəsinə həsr edərək şəxsi həyatını unudan, gecdən-gec rastlaşdığı və ona səadət gətirəcəyini düşündüyü insanın qatilə çevrildiyi kimya müəlliməsinin obrazını yaradan aktrisa Elçin Altındağ və onu sevdiyini söyləyən, lakin həyatını məhv edən keçmiş şagirdinin rolunu oynayan aktyor Əmrah Özərtəmin peşəkar ifaları müəllifin və tamaşaçıların alqışları ilə qarşılanmışdır. Fasilə zamanı səhnə arxasında rejissor və aktyorlarla görüşən müəllif, əsəri yüksək sənətkarlıqla təqdim etdikləri üçün onlara təşəkkürünü bildirmişdir.
Tamaşanın sonunda səhnəyə qalxan yazıçı Elçin bildirmişdir ki, bu gün onun həyatında əlamətdar bir gündür. Ümummilli liderimiz Heydər Əliyevin artıq atalar sözünə çevrilmiş "bir millət, iki dövlət" kəlamı Türkiyə və Azərbaycanın mədəniyyət sahəsində də vəhdətinin təcəssümüdür.
Teatrın kollektivinə təşəkkürünü bildirən və onlara yeni yaradıcılıq uğurları diləyən yazıçı, Azərbaycan dramaturgiyasının digər klassik və çağdaş əsərlərinin də bu teatrda səhnələşdirilməsi arzusunu ifadə etmişdir.
Azərbaycanın Türkiyədəki səfirliyi və İstanbuldakı baş konsulluğu, Türkiyənin müxtəlif dövlət və özəl qurumları adından səhnəyə çələnglər qoyulmuşdur.

Azərbaycan.-2007.-14 fevral.-S.6.