Qatil İstanbulda səhnələşdirilib

Xalq yazıçısı Elçinin pyesinin səhnə müəllifi Məlahət Abbasovadır

Fevralın 12-də Xalq yazıçısı Elçinin "Qatil" pyesi İstanbulun Böyükşəhər Bələdiyyəsi Teatrında səhnəyə qoyulub. Türkiyənin "TRT" kanalının yaydığı məlumata görə, tamaşadan öncə Xalq yazıçısı mətbuat və televiziya işçiləri ilə görüşərək onlara klassik və çağdaş Azərbaycan ədəbiyyatından söz açıb. Axşam saatlarında isə tamaşa sözügedən teatrda ilk dəfə nümayiş etdirilib.

Qeyd edək ki, "Qatil"i uzun illərdə Türkiyədə yaşayan həmyerlimiz Məlahət Abbasova səhnələşdirib. O, səhnə əsərində torpaqlarımıza düşmən təcavüzü ilə başlanan müharibənin, digər tərəfdən, bir ictimai-siyasi quruluşdan digərinə keçidin yaratdığı kataklizmlərin insan taleyində buraxdığı izlərin sosial-psixoloyi təhlili, eyni zamanda, bütün zamanlar üçün aktual olan məhəbbət, tale oyunları və puça çıxan ümidlər mövzusunu ustalıqla səhnəyə qoyub.

Bütün ömrünü şagirdlərinin təlim-tərbiyəsinə həsr edərək şəxsi həyatını unudan, gec rastlaşdığı və ona səadət gətirəcəyini düşündüyü insanın qatilinə çevrildiyi kimya müəlliməsinin obrazını yaradan aktrisa Elçin Altındağ və onu sevdiyinisöyləyən, lakin həyatını məhv edən keçmiş şagirdinin rolunu oynayan aktyor Əmrah Özərtəmin peşəkar ifaları müəllifin və tamaşaçıların rəğbətini qazanıb.

Tamaşanın nümayişindən sonra yaradıcı heyətlə görüşən yazıçı Elçin həmyerlimiz M.Abbasovanın reyissor yozumunda səhnələşdirilən pyesin ustalıqla ərsəyə gətirildiyini və aktyor oyunundan razı qaldığını söyləyib. Daha sonra Xalq yazıçısı Azərbaycan dramaturgiyasının digər klassik və çağdaş əsərlərinin də bu teatrda səhnələşdirilməsi arzusunu ifadə edib.

Kaspi.-2007.-15 fevral.-S.17.