Nəsibə Əsgərova: Nəsibə Zeynalova adına Estrada Teatrında 7 il ərzində bir tamaşa da hazırlanmayıb

2000-ci ildən Moskvada fəaliyyətə başlayan Nəsibə Zeynalova adına Estrada Teatrı təsəvvürümüzdə olan teatr kimi fəaliyyət göstərmir. Bu Teatrda 7 il ərzində bir tamaşa da hazırlanmayıb. Bu açıqlamanı APA-ya xalq artisti Nəsibə Zeynalovanın nəvəsi Nəsibə Əsgərova verib. Son vaxtlar teatrın rəhbəri Sərxan Kərəmoğlu ilə heç bir əlaqəsinin olmadığı bildirən N. Əsgərova onun başqa sahədə fəaliyyət göstərdiyini deyib: Sərxan Kərəmoğlu bir neçə film çəkdi, bunları da bədii film adlandırmaq olmaz. Mən onu sənətdən kənar şəxs hesab edirəm. Düzdür, hansısa işlər görür, ancaq teatrın məhz estrada kimi fəaliyyət göstərməsi yaxşı hal deyil. Nəsibə Zeynalovanın adını daşıyan teatrda ancaq konsertlər təşkil edilir, səhnəciklər göstərilir. N. Əsgərova teatrın truppasının olmadığını da vurğulayıb. O həm teatrın fəaliyyəti ilə bağlı Sərxan Kərəmoğlu ilə danışmaq üçün səlahiyyətinin olmadığını deyib: Moskvaya köçərək bu işlə məşğul olmağa səlahiyyətim çatmır, çünki rejissor deyiləm. Teatrın truppası olmalıdır, ancaq bu teatrın heç truppası da yoxdur. Məsələyə münasibət bildirən Sərxan Kərəmoğlu APA-ya açıqlamasında teatrın Nəsibə Zeynalovanın yolunu davam etdirməsi üçün külli miqdarda vəsaitə ehtiyacı olduğunu deyib: Teatrda bir il ərzində üç konsert təşkil edirik. Bu gün Moskvada tamaşa hazırlamaq qeyri-mümkündür. Tamaşanı qoymaq üçün orada ən azı 10 nəfər iştirak etməlidir ki, bu, tamaşa hesab edilsin. Həmin tamaşa üçün satılan biletlərdən gələn gəlir isə tamaşada iştirak edəcək 10 nəfərin xərcinin heç 10 faizini ödəmir. Bu gün Nəsibə Zeynalovanın adını daşıyan teatrın estrada janrında fəaliyyətə üstünlük verməsinin səbəbi budur.

 

Ekspress.- 2007.- 23 fevral.- S. 13.