Unutqanlıq Qorxunc bəladır

Bakı Bələdiyyə Teatrında rejissor Ələddin Əliyevin quruluşunda "Unutqanlıq qorxunc bəladır" tamaşası nümayiş etdirilib.

Teatrın mətbuat əlaqələndiricisinin məlumatına görə, səhnə əsəri Azərbaycan-Ermənistan, Dağlıq Qarabağ münaqişəsi mövzusundadır.
Qeyd edək ki, tamaşada əsas rolları əməkdar artistlər Əfqan Sultanov, Mahir Yaqubov, Rafiq İbrahimov, Firəngiz Babayeva, aktyorlardan Elxan Rzayev, İsmayıl Atakişiyev və başqaları oynayıblar.

Musiqiçilərimiz Fransada çıxış edəcəklər

Musiqiçilərimiz bu gün Fransa senatının "Salon de-boffrand" zalında konsert proqramı ilə çıxış edəcəklər. Mədəniyyət və Turizm Nazirliyinin mətbuat xidməti əməkdaşının məlumatına görə, Azərbaycanın Fransadakı səfirliyinin təşkilatçılığı və nazirliyin təşəbbüsü ilə keçiriləcək konsertdə əməkdar artist, pianoçu Yeganə Axundova, vokalçılar Samir Cəfərov, Aygün Qurbanova və konsertmeyster Məlahət İsmayılova çıxış edəcəklər.
Gecədə Üzeyir Hacıbəyov, Qara Qarayev, Fikrət Əmirov, Tofiq Quliyevin əsərləri ilə yanaşı, dünya şöhrətli bəstəkarların əsərləri də ifa olunacaq.

"TÜRK DÜNYASINI ŞƏHƏRLƏRLƏ TANIYALIM"

İstanbulda keçiriləcək "Türk dünyasını şəhərlərlə tanıyalım" beynəlxalq festivalında Azərbaycan da iştirak edəcək. Azərbaycan Kinematoqrafçılar İttifaqı mətbuat xidməti əməkdaşının məlumatına görə, festival aprelin 16-dan 23-ə kimi davam edəcək. O bildirib ki, festivala göndəriləcək əsas film şəhər mövzusunda olacaq.
Mətbuat xidməti əməkdaşının sözlərinə görə, İstanbulda iki tammetarjlı filmin nümayişi də nəzərdə tutulub. O, filmlərin hələlik müəyyənləşdirilmədiyini dedi.

"Beyləqan"a klip çəkilib

Beyləqan rayonu haqqında klip çəkilib. "Beyləqan" adlı mahnının sözləri Arif Mədətovun, musiqisi Tahir Əkbərindir. A.Mədətovun məlumatına görə, klipin çəkilişləri Beyləqanda olub. Mahnını Cabir Abdullayev ifa edir. Ekran işində Beyləqan tərəkəmələrinin tarlalarından, təbiətindən, obasından bəhs olunur. Sözügedən klipə martın 2-də təqdimat keçiriləcək.

"Xocalı - əsrin faciəsi"

Mirzə Fətəli Axundov adına Milli Kitabxanada Xocalı faciəsinin 15-ci ildönümünə həsr olunmuş "Xocalı - əsrin faciəsi" adlı tədbir keçirilib. Tədbirdə kitabxana direktoru Kərim Tahirov, mədəniyyət və turizm nazirinin müavini Sevda Məmmədəliyeva, nazirliyin mədəniyyət siyasəti şöbəsinin rəisi Fikrət Balayev çıxış edərək faciənin dünyaya çatdırılmasında əsas vasitənin kitab olduğunu söyləyiblər.
Tədbirdə kitab sərgisi də təşkil edilib. Sərgidə 100-dən artıq kitab, jurnal və qəzet materialları təqdim olunub. Daha sonra kitabxananın saytında yerləşdirilən "Xocalı faciəsi" adlı səhifənin təqdimat mərasimi keçirilib. Bunun ardınca faciələrlə bağlı sənədli filmlər, Gənc Tamaşaçılar Teatrının aktyorlarının ifasında "Qan yaddaşı" tamaşasından fraqmentlər nümayiş etdirilib.

"Novie russkiye babki" sarayda çıxış edib

10 ildir ki, fəaliyyət göstərən "Novıe Russkiye Babki" qrupunun Heydər Əliyev adına Sarayda konserti keçirilib. Növbəti dəfə şəhərin qonağı olan tanınmış yumor qrupu "Starıye lyudi o qlavnom" adlı proqramını təqdim edib.
Qeyd edək ki, Matryona və Tsvetoçek kimi tanınan qrup üzvləri - Sergey İvanov və İqor Kasilov proqramda müxtəlif zarafatlar, yumorlar nümayiş etdiriblər. Rus babkiləri tanınmış müğənniləri, siyasətçiləri parodiya etməkdən də çəkinməyiblər. Səhnəyə sirli görünüşlə - qara şlyapada çıxan yumor ustaları proqram boyu tamaşaçıların diqqətini özlərinə cəlb etməyə nail olublar.
Onu da bildirək ki, biletlərin qiyməti 10 manatdan 55 manata qədər olan proqrama gələnlər kifayət qədər idi. Rus babkiləri özlərini Bakı tamaşaçılarına sevdirmək üçün başqa vasitədən də istifadə ediblər. Tamaşaçılar onların səhnəyə Azərbaycan və Rusiya bayraqları ilə çıxmasını səmimiyyət və mehribanlıq kimi qəbul ediblər.

Ayna.-2007.-28 fevral.-S.8.