Lütfiyyə Səfərova diqqətdən kənarda qalıb

"Dövlətdən layiq olduğum qiyməti ala bilməsəm, bu, səhhətimə pis təsir göstərəcək"

Musiqili Komediya Teatrının aktrisası, "Şirbalanın ilk məhəbbəti" filmində yaratdığı obrazla yaddaşlarda qalan Lütfiyyə Səfərovanın yubileyinə sayılı günlər qalır. Amma aktirsa ona qarşı laqeyd münasibətdən narazıdır: "Martda 65 yaşım tamam olacaq. Hələ heç bir fəxri adla təltif olunmamışam. Heç prezident təqaüdü də almıram. Bir-iki il səhnə fəaliyyəti olanlara böyük qayğı göstərilir, istənilən fəxri adı verirlər. Demirəm onlar buna layiq deyillər. Amma mənim də buna hüququm çatır. Bu gün-sabah həyatdan köçəcəm, hələ də mənimlə maraqlanan yoxdur".

Birotaqlı mənzildə oğlu, gəlini, qızı ilə yaşayan L.Səfərova teatrdan aldığı 50 manat maaşla yaşamağa məcbur olduğunu şəkərli diabetdən əziyyət çəkdiyini dedi: "Aldığım maaşı ancaq dərmanlarım üçün xərcləyirəm. Hərdən teatra getmək üçün yolpulu ehtiyacım yaranır. Sıxıntılarımı evdə gizlətməyə çalışıram. Çünki ailə üzvlərimin də qazancı ürəkaçan deyil".

Uzun illərdir sənətə xidmət etdiyini xatırladan aktrisa xanım yaradıcılığına verilən qiymətin səviyyəsindən giley etdi. Bundan öncəki yubileylərini sakit keçirdiyini bildirən L.Səfərova dövlətdən buna qədər heç nə ummadığını xatırlatdı: "Fikirləşirdim ki, ehtiyac olsa, yəqin, mən də diqqətdən kənarda qalmaram. Amma indi görürəm ki, danışmayınca, heç kimin yadına düşmürəm. Əvvəllər həmkarlarımın şikayətini eşidəndə, düşünərdim ki, kiməsə ağız açıb yardım istəmək, ayıb sayılar. Amma baxıram ki, bu gün səhnədə iki konsert verib, elə iki də disk çıxarana böyük diqqət, qayğı var. Sponsorlar, fəxri adlar, əla dolanışıq... və s. Belə olan halda biz sənətkarların diqqətdən kənarda qalması məni kövrəldir. 65 yaşımı haqlayacağam, nə adım var, nə də diqqət görürəm".

Bu günlərdə məlum məsələ ilə bağlı yenidən Mədəniyyət və Turizm Nazirliyinə müraciət etdiyini söyləyən L.Səfərova bildirdi ki, bundan öncəki məktublarının heç birinə cavab gəlməyib: "Ancaq boş vədlər eşidirəm. Əvvəllər bu vədlər mənə ümid verirdi. Sonradan gördüm ki, elə vəd eşidirəm, nəticəsi yoxdur. Ümid edirəm ki, martın 14-də tamam olacaq 65 illik yubileyimi sakit, ürək ağrıları ilə qarşılamayacam. Yəqin ki, bu dəfə dövlətdən layiq olduğum qiyməti ala bilməsəm, bu, səhhətimə daha pis təsir göstərəcək. Çünki bundan sonra dövlət məmurlarının bir də yadına düşəcəyimi ağlıma belə gətirmirəm".

Kaspi.-2007.-16 fevral.-S.17.