Xocalı faciəsi soyqırımıdır

Akademik Milli Dram Teatrının kollektivi Milli Məclisə müraciət ünvanlayıb

Bir neçə gündən sonra Xocalı faciəsi kimi tanınan dəhşətli qətliamın törədilməsinin 15 ili tamam olur. Bu qətliam təkcə Azərbaycana yox, həm də türk dünyasına, insanlığa qarşı törədilmiş soyqırım idi. Dünən Akademik Milli Dram Teatrının yaradıcı kollektivi Xocalı soyqırımının 15 illiyi münasibəti ilə Azərbaycan Respublikası Milli Məclisinə müraciət ünvanlayıb. Teatrın direktoru, Əməkdar Mədəniyyət İşçisi Maqbet Bünyadovun və xalq artistləri Mərahim Fərzəlibəyov, Siyavuş Aslan, Yaşar Nuriyev, Kamal Xudaverdiyev,  Nurəddin Quliyev,  Bəsti Cəfərova, Firəngiz Mütəllimova, Ramiz Məlikov, Zenfira Nərimanova,  Rafiq Əzimov, Məleykə Əsədova, Elxan Ağahüseyn, Ramiz Novruz, Şüküfə Yusupova, Hacı İsmayılov, Zərnigar Ağakişiyeva, Laləzar Mustafayeva, Azər Nemətov, Ağakişi Kazımov, Telman Adıgözəlov, Rafael Dadaşov, İlham Əsgərov və başqalarının imzası ilə göndərilmiş müraciətdə deyilir: “Xocalı soyqırımı Ermənilər tərəfindən Azərbaycan xalqına qarşı törədilmiş ən dəhşətli soyqırımdır. Və bu soyqırımı dünya ictimaiyyətinə çatdırmaq bizim borcumuzdur.

Azərbaycan dövləti, ölkəmizin ictimai-siyasi qüvvələri XX əsrin ən böyük, ən qanlı cinayəti olan Xocalı soyqırımına siyasi qiymət verilməsi tələbi ilə beynəlxalq qurumlara, dünya dövlətlərinə dəfələrlə müraciət etmişdir. Bu faciəni özündə əks etdirən sənədlər, foto-şəkillər, video-yazılar nümayiş etdirilmişdir.

Lakin təəssüflər olsun ki, insanlığa qarşı törədilən bu vəhşiliyə hələ də siyasi qiymət verilməyib.

Hörmətli Millət vəkilləri!

Bütün Azərbaycan ziyalıları adından, Akademik Milli Dram Teatrının kollektivi adından Sizə müraciət edirik:

Xocalıda erməni faşistlərinin törətdikləri qanlı cinayətin soyqırım kimi tanınması və bu vəhşiliklərin bilavasitə iştirakçılarının müttəhimlər kürsüsündə oturmaları üçün tələbimizi dünya təşkilatlarına, parlamentlərinə çatdırasınız. Qoy bilsinlər ki, Xocalı faciəsi erməni millətçilərinin xalqımıza qarşı apardığı düşmənçilik siyasətinin qanlı səhifəsidir: Soyqırımıdır!”Milli Məclisə ünvanlanmış müraciətə  Əməkdar Artistlər Azər Mirzəyev, Sevil Xəlilova, Əsgər Məmmədoğlu, Sabir Məmmədov, Cəfər Əhmədov, Sadıq İbrahimov, Səidə Quliyeva, Pərviz Bağırov, Əjdər Həmidov, Hicran Nəsirova, Mehriban Xanlarova, Mətanət Atakişiyeva, Sənubər İsgəndərova, Elxan Quliyev, Əli Nurzadə, Kubrabəyim Əliyeva, Telman Əliyev, Firuz Xudaverdiyev, Sevinc Əliyeva, Kazım Abdullayev, Münəvvər Əliyeva, Kazım Həsənquliyev, Rəşid Rzayev,  Naxçıvan MR-nın Əməkdar İncəsənət Xadimi Mehriban Ələkbərzadə də imza atıblar.

Yeni Azərbaycan.-2007.-23 fevral.-S.8.