Ələkbərzadə Ç.

Sumqayıtın mədəniyyət müəssisələri bərbad vəziyyətdədir

Məlumdur ki, respublikamızda mədəni tərəqqi bu gün ən taleyüklü məsələyə çevrilmişdir. Şübhəsiz ki, bu mühüm, vacib prosesdən heç kəs özünü ayrı təsəvvür edə bilməz.

Çox təəssüf ki, respublikamızın ən böyük şəhərlərindən biri olan Sumqayıtda milli-mədəni dəyərlərimiz, mədəniyyət müəssisələri son dərəcə yarıtmaz vəziyyətdədir. Təbii ki, buna başlıca səbəb şəhər mədəniyyət və turizm idarəsinin səhlənkarlığı, işə laqeyd münasibəti olmuşdur.

Aparılan müşahidələr əsasında tam qətiyyətlə demək olar ki, Sumqayıtda "fəaliyyət" göstərən mədəniyyət müəssisələrinin əksəriyyəti bərbad vəziyyətdədir.

Aydınlıq üçün bildirək ki, Sumqayıt Mədəniyyət və Turizm İdarəsinin tabeçiliyində 8 mədəniyyət evi, 7 klub, 4 kinoteatr, 5 musiqi məktəbi, Dövlət Pəsm Qalereyası, tarix muzeyi, mərkəzi kitabxana və

onun 20-yə yaxın filialı, mədəniyyət və istirahət parkı fəaliyyət göstərir. Şəhərin mərkəzində yerləşən "İnşaatçılar", "Beteron", "Gənclik" və s. klub və kinoteatrlar qaçqın və köçkünlər tərəfindən zəbt olunmuşdur. Şəhərin digər klub və mədəniyyət evlərində görülən işlər günün tələbləri səviyyəsində qurulmur.

Sumqayıtın əməksevər insanları İttifaq dövründə kinoteatrları və klubların fəaliyyətlərini yaxşı xatırlayırlar. İnsanlar axm-axın kinoteatrlara axışar, yeni film və tamaşalara baxmaqdan doymazdılar...

Təəssüf ki, hazırda kino-teatr və klublarda nəinki kino-tamaşa göstərilir, əksinə, həmin müəssisələr ayrı-ayrı vətəndaşlara icarəyə verilmişdir. Məlumat üçün bildirək ki, şəhərdəki "Vaqif", "Nizami", "Qaradağ" və "Kosmos" kinoteatrlarında qapı-pəncərə və digər əşyalar hazırlayan sexlər fəaliyyət göstərirlər.

Şübhəsiz ki, şəhərin mədəniyyət müəssisələrinin belə iflic vəziyyətinə əsas səbəb, şəhər mədəniyyət və turizm idarəsinin müdiri Natiq Vəsulovun səriştəsiz və yarıtmaz rəhbərliyinin nəticəsində olmuşdur.

Məlumat üçün bidirək ki, ötən illər ərzində şəhər mədəniyyət və turizm idarəsi mədəniyyət obyektlərinin maddi-texniki bazasının möhkəmləndirilməsi, təlim-tikinti işlərinin aparılması sahəsində heç bir qətiyyətli addım atmamışdır. Bunun nəticəsində şəhərin mədəniyyət evləri, klubları, kinoteatrları, kitabxanaları və s. müəssisələri bərbad və acınacaqlı bir vəziyyətə düşmüşdür.

Haqlı olaraq ortaya belə bir sual çıxır: Görəsən Sumqayıt şəhər Mədəniyyət və Turizm idarəsinə cari və əsaslı təmir üçün ayrılan vəsait hara xərclənib?

Təqdirəlayiq haldır ki, Sumqayıt şəhər İcra Hakimiyyətinin başçısı Vaqif Əliyevin şəxsi təşəbbüsü ilə şəhərdəki Dövlət Rəsm Qalereyası, Bülbül adına 2 saylı musiqi məktəbi və tarix muzeyi əsaslı təmir edilərək istifadəyə verilmişdir.

Son olaraq qeyd etmək istəyirik ki, insanlar həmişə mədəniyyət işçilərinə dərin rəğbət bəsləmiş və onların yolunu səbirsizliklə gözləmişlər. Odur ki, insanlara nümunəvi xidmət göstərmək, onların mənalı istirahətini təmin etmək, arzu və istəklərini layiqincə yerinə yetirmək hər bir mədəniyyət işçisinin müqəddəs borcu olmalıdır.

Unutmamalıyıq ki, insanlara mədəni xidmət etmək zamanın tələbi olmaqla yanaşı, bizim də həm vəzifə, həm də vətəndaşlıq borcumuzdur.

Ədalət.- 2007.- 2 fevral.- S.4.