Kitabxana-informasiya sahəsilə bağlı Dövlət Proqramı hökumətə təqdim olunub

Mədəniyyət və Turizm Nazirliyi tərəfindən 2007-2011-ci illərdə Azərbaycanda kitabxana-informasiya sahəsinin inkişafı və modernləşdirilməsi üzrə dövlət proqramının layihəsi təsdiq edilərək Nazirlər Kabinetinə göndərilib. Bu barədə APA-ya Mədəniyyət və Turizm Nazirliyinin mətbuat xidmətindən məlumat verilib. Məlumatda bildirilib ki, bununla yanaşı, Azərbaycanda rabitə və informasiya texnologiyalarının inkişafı üzrə 2008-ci ilədək dövlət proqramının (Elektron Azərbaycan) yerinə yetirilməsi ilə əlaqədar bir sıra tədbirlərin həyata keçirilməsi planlaşdırılıb. Proqramda kitabxanaların avtomatlaşdırılmasının davam etdirilməsi, onların internetə çıxış təminatı, müasir informasiya daşıyıcıları kolleksiyasının yaradılması yer alıb. Dövlət proqramında Abşeron, Balakən, Beyləqan, Cəlilabad, Hacıqabul, İmişli, Lerik, Sabirabad, Zaqatala, Zərdab rayon mərkəzi kitabxanalarında, Naxçıvan Muxtar Respublikasının M.S.Ordubadi adına Respublika və A.Babayev adına Mərkəzi Uşaq Kitabxanalarında informasiya-təlim mərkəzlərinin açılması planı da öz əksini tapıb. Artıq ölkənin 4 iri kitabxanasının 2007-ci ildən Rusiyanın hüquqi informasiya məlumat bazasına ödənişsiz daxil olması barədə UNESCO-nun "İnformasiya hamı üçün" Proqramı üzrə Rusiya Komitəsi ilə razılıq əldə edilib.

525-ci qəzet.-2007.-2 fevral.-S.7.